मदन भण्डारी जयन्तीमा विभिन्न विधाका खेलकुद प्रतियोगिता हुने (भिडिओ)
काठमाडौं । मदन भण्डारी स्पोटर्स एकेडेमीले विभिन्न विधामा राष्ट्रव्यापी खेलकुद प्रतियोगिता आयोजना गर्दैछ ।
एकेडेमीले आइतबार काठमाडौंमा पत्रकार सम्मेलन गर्दै ७१ औं मदनजयन्तीका अवसरमा असार २२ गतेसम्म विभिन्न विधामा राष्ट्रव्यापी खेलकुद प्रतियोगिता आयोजना गर्ने जानकारी दिएको हो । एकेडेमीले ८ प्रतियोगिताको तालिका समेत सार्वजनिक गरेको छ ।
खेल तालिका अनुसार भैरहवा दमक, वीरगञ्ज र जनकपुरमा ट्यालेन्ट हन्टसहित यू-१४, यू-१६ र यू-१८ प्रतियोगिता हुनेछ । यस प्रतियोगिता असार ३ देखि असार २० गतेसम्म हुनेछ ।
खुल्ला कलेजस्तरीय भलिबल प्रतियोगिता असार ८ देखि १३ गतेसम्म बुटवल र काठमाडौंमा हुनेछ । झापामा रेस्लिङ प्रतियोगिता हुने एकेडेमीका अध्यक्ष ध्रुब आचार्यले जानकारी दिए । खेल र खेलाडीको विकासका लागि एकेडेमीले विभिन्न कार्यक्रम गर्दै आएको उनले बताए ।
त्यस्तै बुटवल र काठमाडौंमा असार ११ देखि १६ सम्म विद्यालयस्तरीय बुद्दिचाल, अन्तर कलेज उपत्यकास्तरीय बास्केटबल काठमाडौंमा हुनेछ भने काठमाडौंमा असार १७ देखि १८ सम्म फूल कन्ट्याक्ट कराते, असार २२ गते काठमाडौंमा प्रशिक्षण तथा तालिम र असार २० देखि २१ सम्म उपत्यकास्तरीय तेक्वान्दो प्रतियोगिता ललितपुरमा हुने एकेडेमीले जनाएको छ ।