कामु प्रधानन्यायाधीशको दाबी- न्यायपालिका सुधारको बाटोमा छ (भिडिओ)

काठमाडौं । सर्वोच्च अदालतका कायममुकायम प्रधानन्यायाधीश दीपककुमार कार्कीले न्यायापालिका सुधारको बाटोमा अघि बढेको बताएका छन् ।

नेपाल ल क्याम्पसको स्थापना दिवसका अवसरमा आज राष्ट्रिय सभागृहमा आयोजित समारोहमा बोल्दै उनले यस्तो बताएका हुन् ।

न्यायपालिका क्षेत्रको सुधारका लागि न्यायाधीश हरिकृष्ण कार्की नेतृत्वको समितिको प्रतिवेदन अनुसार काम अगाडि बढाएको कामु प्रधानन्याधीश कार्कीले बताए ।

‘न्यायालयमा देखिएका कुरा सबै बसेर समाधान गर्न सकिन्छ । सुधारको क्रममा अगाडि बढिरहेका छौं,’ उनले भने,‘न्यायपालिका, अदालत र बारको क्षेत्रबाट सुधारको बाटोमा छौं । हरिकृष्ण कार्कीको प्रतिवेदनलाई कार्यान्वयनको चरणमा छौं ।’

हाल गोलाप्रथाबाट इजलास तोक्न थालिएको र त्यसपछि अटोमेटिक प्रणालीमा जान खोजिरहेको उनले बताए ।

न्यायपालिकामा देखिएका विसंगतिहरूको सम्बन्धमा यस्ता विकृति र विसंगतिको न्यूनीकरणका लागि आगामी पाठ्यक्रमको नैतिक शिक्षामा पनि जोड दिनुपर्ने कामु प्रधानन्यायाधीश कार्कीले बताए ।

‘नैतिकताको विषयमा पनि अलिकति विचार गर्नुपर्छ र पाठ्यक्रममा पनि ध्यान दिनुपर्छ । यसमा सम्बन्धित निकायले ध्यान दिनुपर्छ,’ उनले भने ।