देउवालाई प्रकाशमानको प्रश्न – यसरी सरकार चलाएर भएन, जनताले के पाए ?

काठमाडौं । सानेपामा ३ दिनदेखि जारी नेपाली कांग्रेसको केन्द्रीय समिति बैठकमा नेताहरूले आ-आफ्नो धारणा राखिरहेका छन् ।

यसैक्रममा केन्द्रीय सदस्य प्रकाशमान सिंहले सरकारको कार्यशैलीप्रति आपत्ति जनाएका छन् ।

प्रधानमन्त्री एवं सभापति शेरबहादुर देउवालाई लक्षित गर्दै उनले सरकारले देखिने गरी काम नगरेको टिप्पणी गरे । जनताले सरकारबाट केही नपाएको भन्दै नेता सिंहले यस्तै पाराले निर्वाचनमा जाँदा गार्‍हो हुने चेतावनी दिए ।

‘सरकार गतिशील भएन, यसरी सरकार चलाएर भएन । एकपछि अर्को गल्ती भइरहेको छ । देखिने काम गर्नुपर्‍यो । जनताले सरकारबाट के पाए ? यसले निर्वाचनमा जाँदा गाह्रो हुन्छ । स्थानीय तहको चुनावमा पनि राम्रो भएन ‘, उनले भने ।