प्रदर्शनकारीद्वारा श्रीलंकाको राष्ट्रिय टेलिभिजनको कार्यालय कब्जा, रोकियो प्रसारण (भिडिओ)

काठमाडौं । राष्ट्रपति गोटाबाया राजापाक्षे परिवारसहित देश छोडेर भागेसँगै श्रीलंकाको अवस्था थप तनावग्रस्त बनेको छ । देशका विभिन्न ठाउँमा जारी सरकारविरोधी प्रदर्शनहरुले उग्र रुप लिएपछि हाल श्रीलंकामा संकटकालको घोषणा गरिएको छ । केही स्थानमा कर्फ्युसमेत लगाइएको छ ।

यसैबीच आक्रोशित प्रदर्शनकारीहरुले श्रीलंकाको राष्ट्रिय टेलिभिजन ‘रुपाबहिनी’ को कार्यालय पनि कब्जामा लिएका छन् ।

प्रदर्शनकारीहरुले कब्जामा लिएसँगै हाल उक्त टेलिभिजनका सम्पूर्ण प्रसारण रोकिएको अन्तर्राष्ट्रिय सञ्चारमाध्यमहरुले जनाएका छन् ।

कार्यालय कब्जामा लिएपश्चात केही प्रदर्शनकारीहरुले टेलिभिजन लाइभमै गएर उक्त टेलिभिजन निष्पक्ष हुनुपर्ने र अबदेखि यस टेलिभिजनले जनतामुखी कार्यक्रममात्र प्रसारण गर्ने घोषणा गरेका थिए ।