प्रतिनिधिसभाले साढे २ वर्षपछि उपसभामुख पाउँदै, यस्तो छ संसदको गणित

काठमाडौं । प्रतिनिधिसभामा रिक्त उपसभामुख पद पूर्तिका लागि आज निर्वाचन हुँदैछ । दिउँसो ३ बजे बस्ने संसद बैठकमा उपसभामुख चयनका लागि मतदान प्रक्रिया सुरू गर्ने कार्यसूची रहेको छ ।

उपसभामुखका लागि सत्तारुढ ५ दलीय गठबन्धनबाट नेपाली कांग्रेसकी पुष्पा भुसाल उम्मेदवार छिन् । त्यस्तै प्रमुख प्रतिपक्ष नेकपा एमालेले विद्या भट्टराईलाई मैदानमा उतारेको छ ।

डा. शिवमाया तुम्बाहाङफेले २०७६ माघ ६ मा राजीनामा दिएपछि करिब साढे २ वर्षदेखि उपसभामुख पद रिक्त थियो ।

सुरूमा साना दलले उम्मेदवार उठाए समर्थन गर्ने तयारी गरेको एमालेले अन्तिम अवस्थामा लोसपा गठबन्धनतिर लागेपछि आफ्नै उम्मेदवार खडा गरेको हो । लोसपाले चन्दा चौधरीलाई उपसभामुखको उम्मेदवार बनाउने तयारी गरेपनि सरकार तथा आसन्न निर्वाचनमा सम्भावित नाफा आँकलन गर्दै गठबन्धनलाई सघाउने निर्णय गरेको थियो ।

२७५ सदस्यीय प्रतिनिधिसभामा ४ सांसद रिक्त छन् । बाँकी २७१ मा पनि चारजना निलम्बनमा रहेका २६६ जनाले मतदान गर्न पाउँछन् । १३४ मत भए उपसभामुख जित्न पुग्छ ।

गठबन्धनसँग हाल कांग्रेसका ६१, माओवादीका ४९, नेकपा एसका २४ सांसद छन् । जसपाका केही सांसद बाबुरामतिर छन् भने केही तटस्थ रहेका छन् । गठबन्धनमा आबद्ध राजमोको एक सांसद छन् भने नेपाल मजदुर किसान पार्टी र राप्रपाका एक-एकजना सांसद छन् ।

कांग्रेस, माओवादी र नेकपा एसको मत नै सत्ता गठबन्धनलाई जित्न पुग्ने देखिन्छ ।