नेपाल-भारत सम्बन्ध परापूर्वकालदेखि नै प्रगाढ छ: प्रचण्ड

काठमाडौं । पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहालले नेपाल-भारतबीचको सम्बन्ध परापूर्वकालदेखि नै प्रगाढ रहेको बताएका छन् ।

भारतीय सत्तारुढ दल भाजपाको निमन्त्रणामा भारत भ्रमणमा रहेका उनले आज आयोजित एक समारोहमा सम्बोधन गर्दै यस्तो बताएका हुन् ।

‘नेपाल-भारतबीचको सम्बन्ध परापूर्वकालदेखि नै प्रगाढ छ’, उनले भने, ‘यो सम्बन्ध सामाजिक, सांस्कृतिक, परम्परागत र जनता-जनताबीच जोडिएको छ ।’

सम्बोधनका क्रममा अध्यक्ष प्रचण्डले दुई देशबीचको सीमापार सम्बन्ध निकै महत्वपूर्ण रहेको पनि बताए । जसलाई संस्कृति, सभ्यता र जनता-जनताबीचमा मात्र नभई द्विपक्षीय व्यापार र अर्थतन्त्रले पनि जोडिएको बताए ।

यस्तै भूकम्प, कोभिड १९ महामारीमा भारत सरकार र त्यहाँका जनताले नेपाललाई गरेको सहयोग पनि उनले सम्झिए । ‘भूकम्पपछि उद्धार र पुनर्निर्माणमा भारत सरकार र भारतीय जनताले गरेको सहयोगका लागि विशेष धन्यवाद छ’, उनले भने, ‘यस्तै कोभिड १९ मा अत्यावश्यक रहेको खोप भारत सरकारले तत्कालै उपलब्ध गराएकोमा पनि धन्यवाद दिन चाहन्छु ।’

यस्तै भारत सरकारले नेपालको विकासमा लामो समयदेखि गरेको सहयोग पनि महत्वपूर्ण रहेको अध्यक्ष प्रचण्डले बताए ।

आगामी दिनमा अर्थतन्त्र र व्यापार बढाउन नेपालले दुई देश जोड्ने पूर्वाधार जसमा सडक, रेलमार्ग, जलमार्ग र विद्युत प्रशारणलाइनलाई प्राथमिकतामा राखेको बताए ।

कृषिले सहकार्यका लागि ठूलो सम्भावना बोकेको पनि उनले बताए । यी क्षेत्रमा दुई देशबीचमा सहकार्यका लागि थप प्रयास हुनुपर्नेमा उनले जोड दिए ।