गृहमन्त्रीको ब्रिफिङ- गठबन्धनविना माओवादी चुनाव लड्दैन, हामीले नगरे अर्को पार्टनर खोजिहाल्छ

काठमाडौं । गृहमन्त्री एवं नेपाली कांग्रेसका केन्द्रीय सदस्य बालकृष्ण खाणले नेकपा माओवादी केन्द्र एक्लै चुनाव नलड्ने दाबी गरेका छन् । कांग्रेसको जारी केन्द्रीय समिति बैठकमा आज कुरा राख्दै उनले यस्तो बताएका हुन् ।

‘गठबन्धनविना माओवादी एक्लै चुनाव लड्दै लड्दैन । उसले कुनै अर्को पार्टनर खोजिहाल्छ’, उनले भने, ‘गठबन्धन भयो भने कसैको पनि सीट जानसक्छ । यसका लागि सबै तयार रहनुपर्छ ।’

अहिलेमात्र होइन धेरै पछाडिसम्म पनि गठबन्धनको आवश्यकता रहेको उनले बताए ।

नेता शेखर कोइरालाले आफ्नो पछाडि सुराकी पठाएको भन्ने अभिव्यक्तिको गृहमन्त्री खाणले खण्डन गरे । उनले भने, ‘गृह प्रशासनको नियमित ड्युटीअनुसार नै सूचना संकलन हुन्छ । कसैको सुराकी, चियोचर्चो भएको भए, त्यसैवेला भन्नुपर्ने हुन्छ ।’

यस्तो कुराको स्टन्ट देखाउनु आवश्यक पनि नरहेको उनले बताए । ‘महिनापछि मिडियामा पोलिटिकल स्टन्टको कुनै आवश्यक छैन’, उनले भने ।