एमसीसीबारे ओलीले झुट बोलेको नारायणकाजीको आरोप

काठमाडौं । नेकपा माओवादी केन्द्रका नेता नारायणकाजी श्रेष्ठले एमाले अध्यक्ष केपी शर्मा ओलीले एमसीसीबारे झुटो बोलेको आरोप लगाएका छन् ।

श्रेष्ठले फेसबुकमार्फत हिजो आयोजित एक कार्यक्रममा एमसीसी गुपचुप राख्नुभन्दा राष्ट्रिय बहसका लागि संसदमा पेस गरेको ओलीको भनाइ सत्य नभएको बताएका हुन् ।

‘एमसीसी सम्झौतालाई त्यसमा समावेश गरिएको प्रावधान अनुसार नेपालको घरेलु ऐनभन्दा माथिल्लो हैसियतमा राख्न नेपालको सन्धि ऐनअन्तर्गत प्रतिनिधिसभा पारित गर्नु आवश्यक भएको ले एमसीसी अमेरिकाले सम्झौता हस्ताक्षर गर्दाको क्षणदेखि नै संसदबाट अनुमोदनका लागि दबाबसहित अनुरोध गर्दै आएको थियो’, वास्तविकता यस्तो छ भन्दै श्रेष्ठले लेखेका छन्, ‘तर त्यो सम्भव भइरहेको थिएन । पछिल्लोपटक क • केपी प्रम हुनुभएपछि एमसीसी अमेरिकाले संसदबाट अनुमोदनका लागि नेपाल सरकारलाई औपचारिक पत्र पठायो र केपी सरकारले संसदबाट अनुमोदनका लागि प्रकृया अघि बढायो ।’

संसद कमजोर भएकाले त्यो एमसीसी पारित गरेको ओलीको भनाइप्रति पनि उनले जवाफ दिएका छन् । एमसीसी सदनबाट अनुमोदन गरिनुभन्दा केही दिन अघि प्रचण्डलगायतका नेता एमसीसी अनुमोदनलाई संसदबाट मिलेर असफल पारौं र नयाँ गठबन्धन बनाएर अघि बढौं भन्ने प्रस्ताव लिएर जाँदा ओलीले सम्झौतामा राष्ट्रिय हितविपरीतका कुनै प्रावधान नरहेकाो बताएको श्रेष्ठले दाबी गरेका छन् ।

आजै अर्को स्टाटस लेखेर नेता श्रेष्ठले ओलीले अहंकार प्रदर्शन गर्दै वाम एकतामा ठेस पुग्नेगरी अभिव्यक्ति दिएको टिप्पणी गरेका छन् । वाम एकता र तालमेल नभए देशको स्वाधीनता खतरामा पर्ने श्रेष्ठले बताएका थिए ।

श्रेष्ठको भनाइतर्फ लक्षित गर्दै ओलीले कोही वामपन्थी भए कांग्रेससको पुच्छर बन्न छाडेर एकतामा आउनुपर्ने बताएका थिए ।

श्रेष्ठले भनेका छन्, ‘ओलीले प्रम हुँदा संविधानको प्रावधान बिरुध्द प्रतिनिधिसभा विघटन गरेको कारणबाट उहाँ नेतृत्वको एमालेको लोकतान्त्रिक विश्वसनियतामाथि समेत प्रश्न उठ्ने गरेको विषयमा आत्मालोचक हुनुको सट्टा त्यस प्रकारको अभिव्यक्ति दिनु निश्चय पनि सकारात्मक संकेत होइन । यसले अहं त तुष्टी गर्ला, तर देश, जनता र वामपन्थी आन्दोलनलाई कुनै योगदान पु-याउने छैन ।’

मैले आत्मालोचक भई वाम तालमेल र एकता गरौं भन्ने प्रस्ताव राख्दा र वकिल जस्तो मात्र नहुन उपरोक्त अपील गर्दा समेत हलमा उपस्थित श्रोता सहभागीहरूले कर्तल्ध्वनीका साथ ताली बजाएर समर्थन गर्नु भएको थियो । तिनै श्रोता सहभागी हरुले क• ओलीले अहंकारको प्रदर्शन गर्दै वामएकतामा ठेस पुग्ने गरी बोल्दा पुन: अझ जोडले ताली बजाउनु भयो । यसले वाम तालमेल र एकतालाई सहयोग पु-याँउछ त ? पु-याउँदैन । हामी कहिले सच्चिने होला ? गम्भीरतापूर्वक सोचौं ।’