डीएसपीलाई कारबाही र प्रशासकीय अधिकृत फेर्ने सहमतिपछि तिलोत्तमाको नगरसभा सुरू

रुपन्देही । वडाध्यक्षलाई धकेलेर पौडीपोखरीमा फाल्ने डीएसपीलाई कारबाही गर्ने र विवादास्पद भूमिकाको आरोप लागेका प्रमुख प्रशासकीय अधिकृतलाई फेर्ने कांग्रेस-एमालेको सहमतिपछि रुपन्देहीको तिलोत्तमामा रोकिएको नगरसभा सुचारु भएको छ ।

आइतबारको नगरसभामा सहभागी वडा नम्बर ४ का अध्यक्ष हरिबहादुर क्षेत्रीलाई पौडीपोखरीमा धकेल्ने डीएसपी ठगबहादुर केसीलाई कारबाहीको सिफारिस गर्ने सहमति भएको हो । सहमतिसँगै आज नगरसभा पूर्वनिर्धारित समयमै सुरू भयो । यस नगरपालिकामा एमालेको बहुमत छ ।

कांग्रेस र एमाले जनप्रतिनिधिबीचको विवादले तिलोत्तमाको बजेट पारित हुन सकेको छैन । मेयर खाणले नगरसभा रोकेपछि जनप्रितिनिधिले विरोध गरेका थिए । प्रहरी-प्रशासनको आडमा दमन गरिएको भन्दै एमालेले आन्दोलन समेत गरेको थियो ।

एमाले जनप्रतिनिधि र मेयर खाणबीच असमझदारी हटाउने, न्यायिक समितिमा नेपाली कांग्रेसको तर्फबाट एकजना प्रतिनिधि राख्ने र नगरसभाको कार्यसूचीमा विषयगत समितिहरू गठन गर्ने विषय समावेश गर्ने सहमति भएको छ ।

यसअघि प्रमुख प्रशासकीय अधिकृत जीवन ज्ञवालीले निभाएको नगरसभा सचिवको भूमिका आज भने माधव पौडेललाई दिइएको छ ।