किशोरी बलात्कार प्रयास गर्ने वडाध्यक्ष धरौटीमा छुटे, फूलमालाले स्वागत

हेटोंडा । १४ वर्षकी किशोरीमाथि बलात्कारको प्रयास गरेको आरोपमा पक्राउ परेका मकवानपुरको कैलाश गाउँपालिका वडा नम्बर ९ का अध्यक्ष भुवनसिं घलान २४ हजार रुपैयाँमा धरौटीमा छुटेका छन् ।

पक्राउ परेको एक सातामा वडाध्यक्ष घलानलाई जिल्ला अदालत मकवानपुरले २४ हजार धरौटीमा रिहा गर्न आदेश दिएको हो । उनलाई प्रहरीले असार २८ गते पक्राउ गरेको थियो ।

वडाध्यक्ष रिहा भए पनि किशोरी भने सेफ हाउसमा छिन् । गत असार १८-१९ गते हेटौंडामा सम्पन्न राष्ट्रपति रनिङ शिल्ड प्रतियोगितामा भाग लिन आएकी कैलाश– ९ को कालिका माविकी विद्यार्थीले आफूलाई वडाध्यक्षले बलात्कारको प्रयास गरेको भन्दै प्रहरीमा उजुरी दिएकी थिइन् ।

हेटौंडा– १ जरुवाटोलस्थित असन गेष्ट हाउसको तेस्रो तलामा १९ गते राति १२ः३० बजे वडाध्यक्षले बलात्कार गर्ने उद्देश्यले शरीरको संवेदनशील अंगहरु सुम्सुम्याएको जाहेरीमा विद्यार्थीले उल्लेख गरेकी थिइन् ।

घटना १९ गते रातिको भए पनि किशोरीले असार २२ गते आफ्नो आमालाई घटनाको बारेमा बताउँदै वडाध्यक्षविरुद्ध किटानी जाहेरी दिएकी थिइन् । प्रहरीले २२ गते उजुरी बुझ्न आनाकानी गरेपछि २३ गते महिला अधिकारकर्मीको सहयोगमा जाहेरी दर्ता भएको थियो ।

बलात्कार प्रयासको आरोप लागेका वडाध्यक्ष धरौटीमा रिहा हुँदा उनलाई फूलमालाले स्वागत गरिएको छ ।