सौगात र सृष्टि श्रेष्ठ अभिनित ‘माइकल अधिकारी’ को ट्रेलर सार्वजनिक

काठमाडौं । सौगात मल्ल र सृष्टि श्रेष्ठ अभिनित सिनेमा ‘माइकल अधिकारी’को ट्रेलर सार्वजनिक भएको छ । सार्वजनिक गरिएको ३ मिनेट १९ सेकेन्ड लामो ट्रेलरमा सौगात र सृष्टि श्रीमान र श्रीमतीको भूमिका प्रस्तुत भएका छन् ।

रन्जित रौनियार निर्देशित सिनेमाले शहरमा रोजीरोटीका लागि संघर्ष गरिरहेको एक दम्पतीमा आर्थिक समस्याले उत्पन्न हुने घरझगडा र पैसाका लागि कोख भाडामा लगाउने महिला आमा बन्छिन् । आफ्नो बच्चा अरुलाई सुम्पिन तयार नभएपछिको परिस्थितिलाई कथाले प्रस्ट्याउन खोजेको छ ।

निर्देशक रन्जितको कथा रहेको सिनेमा आगामी भदौ ३ गतेबाट नेपालभरका रिलिज हुँदैछ । मनोज केसी प्रोडक्सन म्यानेजर रहेको सिनेमामा कमल राई र कविराज गहतराजको कोरियोग्राफी, शम्भुजित बाँस्कोटा र रेभन सिंहको संगीत, शैलेश कँडेल क्षेत्री र दयाराम पाण्डेको शब्द रचना, मित्र डि गुरुङको सम्पादन, राजु विक्रम थापाको छायांकन र शैलेश कँडेल क्षेत्रीको पटकथा तथा संवाद रहेको छ ।

उद्दव पौडेलको प्रस्तुतीमा निरक पौडेल निर्माता रहेको सिनेमामा अशान्त शर्मा, लुनिभा तुलाधर, एनी कुँवर, हेमन्त बुढाथोकी, विद्या कार्की, दीलिप बोहोरा, केन्द्र भट्टराई, बाल कलाकारहरु आर्या पौडेल र केभिन परियारको अभिनय छ । गरिबी, अभाव र समस्याको कारण अर्काको भ्रुण गर्भमा हुर्काएर बच्चालाई जन्म दिने सरोगेसी आमाको कथामा सिनेमा निर्माण भएको हो ।