वन कर्मचारीकै अगुवाईमा ओली सरकारले खारेज गरेको वैज्ञानिक वन व्यवस्थापन ब्युँताउँदै

रुपन्देही ।केपी ओली नेतृत्वको सरकारले खारेज गरेको वैज्ञानिक वन व्यवस्थापन उपभोक्ता महासंघ ब्युँताउन रुपन्देहीमा गोप्य रुपमा भेला आयोजना गर्न लागिएको छ ।

कपिलवस्तुको डिएफओ विजयराज सुवेदीको अगुवाईमा बन्न लागेको यो महासंघ सामुदायिक वन उपभोक्ता महासंघ फेकोफनको काउन्टरमा बनाउन लागिएको हो । साउन ७ गते दिउँसो रुपन्देहीको देवदहमा आयोजना गर्न यसको राष्ट्रिय भेला भनिएपनि गुपचुपमा गर्न लागिएको छ ।

यस क्षेत्रका सरोकारहरुले नेपालमा सामुदायिक वन क्षेत्रलाई कमजोर बनाउनेगरी यसलाई सक्रिय बनाउन थालिएको आरोप लगाएका छन् । तर वैज्ञानिक वनका क्षेत्रमा वकालत गर्नेहरुले भने वनकै संरक्षण गर्नका लागि यो संस्था बनाउन लागेको दावी गरेका छन् ।

कपिलवस्तुमा दर्ता भएको यो संस्थाको तदर्थ समितिले संघीय वन मन्त्रीलाई नै कार्यक्रममा आमन्त्रण गरेपनि पछि विवादित भइने डरले उनी आउन नचाहेको स्रोतले बताएको छ । संघीय मन्त्री नआउने भएपछि शुक्रबार अबेर लुम्बिनी प्रदेशका वन मन्त्री सुरेन्द्र हमाललाई यसको प्रमुख अतिथि निम्त्याइएको छ ।

सामुदायिक वन उपभोक्ता महासंघका केन्द्रीय सचिव ठाकुर भण्डारीले समुदायको अधिकार खोसेर वनका कर्मचारी मोटाउनेगरी अघिल्लो सरकारले खारेज गरेको कामलाई अगाडि सारिएको आरोप लगाएका छन् ।

‘यसमा वनका कर्मचारीले नै अगुवाई गरेका छन्, अघिल्लो सरकारले यसलाई सबै अध्ययन गरेर नै खारेज गरेको हो, यसको विधि नै गलत छ, यसबाट बनका कर्मचारी नै मोटाउने हुन् र केही यसका अगुवालाई फाइदा पुग्ने हो, उपभोक्तालाई हामीले सचेत बनाएकै छौं’ उनले भने ।

वैज्ञानिक वन व्यवस्थापन उपभोक्ता राष्ट्रिय महासंघको तदर्थ समितिका संयोजक रेनु सेनले भने यो वन संरक्षणकै लागि बनाउन थालेको दावी गरिन् । ‘हामीले ७५ जिल्लामा समिति बनाएका छौं, सबै जिल्लाबाट प्रतिनिधि आउँदै हुनुहुन्छ, गोप्य होइन, सबैलाई समयमा सूचना दिन नसकिएको हो,सुरुमा छौं सबै कुरा सिक्दै छौं’ उनले भनिन् ।

तर उनकै तदर्थ समितिमा रहेका व्यक्तिहरुले सेनले आफूसँग नजिक रहेकाहरुलाई मात्र प्रतिनिधि बनाएको ६० जिल्लाका सामुदायिक वनले वैज्ञानिक वन व्यवस्थापन गरेपनि ३० जिल्लाका सीमित प्रतिनिधि बोलाएको र गुपचुपमा राष्ट्रिय महाधिवेशन गर्न लागेको आरोप लगाएका छन् ।

नयाँ नेतृत्वका लागि हाल तदर्थ समिति अध्यक्ष रहेकी सेन नै नेतृत्वका लागि इच्छुक रहेकी छन् । तर उनलाई नेतृत्वमा आउन नदिन उनी यसअघि मुद्दामा मुछिएर अख्तियारमा पुगेको विषयलाई उठाउने भएका छन् ।

कपिलवस्तुको बाणगंगा नगरपालिकास्थित श्रृंङगीघाट सामुदायिक वनको अध्यक्ष रहेको बेला सेनले २०७७ भदौमा ९ सय ४० क्यूफिट काठ चोरेको आरोप छ । ‘यो मुद्दा अझै सल्टिएको छैन, उहाँलाई नेतृत्व दिँदा यो संस्था नै विवादित बन्नजान्छ’ तदर्थ समितिका एक सदस्यले भने ।