दलाल पूँजीवादलाई पोसेर समाजवाद आउन सम्भव छैनः माधव नेपाल

काठमाडौं । नेकपा एकीकृत समाजवादीका अध्यक्ष माधवकुमार नेपालले दलाल पूँजीवादलाई पोसेर समाजवाद आउन सम्भव नभएको बताएका छन् ।

शनिबार नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४४ औं स्मृति दिवसका अवसरमा आयोजित कार्यक्रममा अध्यक्ष नेपालले कम्युनिष्ट एकतामा पुष्पलालले खेलको भूमिकाको स्मरण गर्दै कम्युनिष्टमा देखिएको विकृतिप्रति सजग हुनुपर्ने बताए ।

उनले राजनीतिमा विकृति, विसंगति, व्यक्तिवादी प्रवृति देखा परेको भन्दै यसप्रति सबै सजक भएर आफूले कर्तव्य पुरा गरेको छ कि छैन भन्ने समिक्षा गर्नुपर्ने धारणा राखे । दलाल पुँजीलाई पोसेर देशमा समाजवाद आउन सम्भव नरहेको उनको तर्क छ ।

पुष्पलाल श्रेष्ठले विश्व कम्युनिस्ट घोषणापत्रलाई वि.सं. २००५ सालमा नेपालीमा अनुवाद गरी कम्युनिस्ट सिद्धान्तलाई नेपाली माक्र्सवादी विश्लेषकको पहिचान दिएका थिए । पुष्पलालको ५४ वर्षको उमेरमा २०३५ साल साउन ७ गते निधन भएको थियो ।