कांग्रेसले सहिदलाई उचित सम्मान दिन सकेन : ओली

काठमाडौं । नेकपा एमालेका अध्यक्ष केपी शर्मा ओलीले प्रजातान्त्रिक लडाइँमा सहिद भएकाहरूलाई नेपाली कांग्रेसले उचित सम्मान दिन नसकेको बताएका छन् ।

पुष्पलाल स्मृति दिवसका अवसरमा शनिबार काठमाडौंमा आयोजित कार्यक्रममा अध्यक्ष ओलीले राजनीतिक पूर्वाग्रहका आधारमा कांग्रेसले प्रजातान्त्रिक लडाइँमा सहिद भएकाहरूलाई उचित सम्मान दिन नसकेको बताए ।

भीमदत्त पन्तलगायत केहीलाई कांग्रेसले सहिद नमानेको ओलीको तर्क थियो । उनले अग्रजहरुलाई सम्मान गर्दा फराकिलो सोच राख्नुपर्ने बताए । पुष्पलालले स्थापना गरेको पार्टी नेकपा एमाले बलियो पार्टीको रुपमा रहेको भन्दै उनले मुलुकलाई समृद्ध नेपाल, सुखी नेपाली बनाएर छोड्ने प्रतिबद्धता जनाए ।

पुष्पलालको जीवनको चर्चा गर्दै अध्यक्ष ओलीले नेपालको राजनीतिक, सामाजिक र आर्थिक परिवर्तनमा उनले पुर्‍याएको योगदानको स्मरण गरेका थिए ।

कार्यक्रममा अन्य विभिन्न पार्टीबाट कार्यकर्तालाई ओलीले एमालेमा प्रवेश गराएका थिए । त्यस्तै अग्रज नेताहरुलाई सम्मान गरिएको थियो ।