कट्रिना र विक्कीलाई ज्यान मार्ने धम्की ! प्रहरीमा दिए उजुरी

काठमाडौं । एक अज्ञात व्यक्तिबाट सामाजिक सञ्जालमार्फत आफूहरुलाई बारम्बार ज्यान मार्ने धम्की आएको भन्दै बलिउड कलाकार कट्रिना कैफ र विक्की कौशलले प्रहरीमा उजुरी दिएका छन् ।

धम्कीबाहेक अज्ञात व्यक्तिले आफ्नी धर्मपत्नी कट्रिनालाई पीछा पनि गरेको भन्दै विक्कीले भारतीय दण्ड संहिताको धारा ५०६–२ (अपराधिक धम्की) र ३५४–डी (पछ्याएकोमा) अन्तर्गत सान्टाक्रुज पुलिस स्टेशनमा उजुरी दर्ता गराएका हुन् ।

समाचार एजेन्सी एएनआईको रिपोर्टअनुसार मुम्बई पुलिसले कट्रिना र विक्कीलाई ज्यान मार्ने धम्की दिने सो अज्ञात व्यक्ति विरुद्ध मुद्दा दर्ता गरी अनुसन्धान सुरु गरिसकेको छ ।

एक हप्ताअघि कट्रिनाको फ्यान क्लबले अज्ञात व्यक्तिलाई अभिनेत्रीको तस्वीर र भिडिओहरु नखिच्न र उनलाई नपछ्याउन सल्लाह दिएका थिए ।

सल्लाह दिएपश्चात पनि ति व्यक्तिले फ्यान क्लबलाई नै गाली गर्दै कट्रिना आफ्नी श्रीमती भएको र यदि उनले आफूसँग भेट्न नमाने हत्या गर्ने बताएको फ्यान क्लबको दाबी छ ।

अज्ञात व्यक्तिबाट आएको सो टिप्पणीपछि फ्यान क्लबले ट्वीटरमा स्क्रिनसटहरू समेत सार्वजनिक गरेका थिए । यद्यपि अहिलेसम्म दम्पतीलाई ज्यान मार्ने धम्की दिने र फ्यान क्लबलाई मेसेज गन व्यक्ति एकै हो भन्‍ने आधिकारिक पुष्टि भने हुन सकेको छैन ।