एक वर्षमा बोक्सी आरोपका ४९ घटना दर्ता

काठमाडौं । अन्धविश्वासका रुपमा रहेको बोक्सीसँग सम्बन्धित अपराधका घटना पछिल्ला १२ महिना देशभर उल्लेख्य मात्रामा भए ।

प्रहरी तथ्यांकअनुसार देशभर ४९ वटा बोक्सी आरोपसँग सम्बन्धित जाहेरी दर्ता भएका थिए ।

काठमाडौं उपत्यकामा १, प्रदेश–१ मा ५, मधेश प्रदेशमा २८, बागमती प्रदेशमा ४, लुम्बिनी प्रदेशमा ७, कर्णाली प्रदेशमा २ र सुदुर पश्चिम प्रदेशमा दुई वटा मुद्धा बोक्सी आरोपसँग सम्बन्धित दर्ता भएको प्रहरी तथ्यांकले देखाएको छ ।

आर्थिक वर्ष ०७६/७६ मा देशभर ३४ र आर्थिक वर्ष ०७७/७८ मा देशभर ६१ वटा बोक्सी आरोपका घटना भएका थिए ।

ती दुवै आर्थिक वर्षमा यी घटना सबैभन्दा बढी मधेश प्रदेशमा भएका छन् । ती दुई वर्ष मधेश प्रदेशमा मात्र ४२ वटा मुद्धा बोक्सी आरोपसँग सम्बन्धित दर्ता भएका थिए ।