सुनिताको ‘यो रमाइलो तीजैमा’ सार्वजनिक (भिडिओ)

काठमाडौं । गायिका सुनिता दुलालको ‘यो रमाइलो तीजैमा’ बोलको गीत सार्वजनिक भएको छ । उन्नति बोहरा ‘शिला’ को शब्दमा शम्भुजीत बास्कोटा संगीत भरेको यो गीतमा मनोहर सुनमले संगीत संयोजन गरेका छन् । श्याम श्वेत रसाइलीले यो गीतको मिक्सिङ तथा मास्टरिङको काम गरेका हुन् ।

गीतको भिडियोमा गायिका दुलालसँगै अभिनेत्री करिश्मा मानन्धर, मोडल अञ्जली अधिकारी, लक्ष्मी जोशी, राधा लम्साल ‘भबु’, गजित विष्ट, भोजराज शर्मा लगायतको अभिनय रहेको छ । भिडियोलाई गम्भीर विष्टले निर्देशन गरेका हुन् । ज्ञानेन्द्र शर्माले छायाँकन गरेको भिडियोलाई राजकुमार श्रेष्ठले सम्पादन तथा सिमोन लामाले भिडियोलाई कलर गरेका हुन् । राइज मिडिया नेटवर्कले यो भिडियोको पोष्ट प्रोडक्सन गरेको हो ।

‘तीज क्वीन’ को रूपमा परिचित गायिका दुलालले तीजको छेको पारेर हरेक वर्ष एकल आवाजमा गीत सार्वजनिक गर्दै आएकी छिन् । अघिल्लो वर्षको तीजमा उनले ‘स्वामीकी प्यारी’ बोलको गीत सार्वजनिक गरेकी थिइन् । त्यसअघि कोभिड महामारीको बीचमा पनि उनले ‘जुममा हेरेर’ तीज गीत बजारमा ल्याएकी थिइन् ।

योसँगै यसपालि नि खाने दर, म त छम छम, तीजको आयो लहर, चुप्प म्वाइँ खाउँला आमा, सधैँ तीजमा व्रत, पोहोरको तीजमा रातो, नाच्नलाई पैताला, यसपालिको तीजमा, अलि फरक भाकी छु, चुरा टिका लाली, अर्ग्यानिक तीज, तीज भनेकै नाच्न गाउन, दर खाने दिन लगायतका चर्चा पाएका तीज गीत दुलालकै नाममा छन् ।