काठमाडौं उपत्यकाभित्र स्कुल बसका चालक नै मापसेमा !

काठमाडौं । काठमाडौं उपत्यकाभित्र स्कुल बस चालकहरु नै मादक पदार्थ सेवन गरेर सवारी साधन चलाउने गरेको पाइएको छ ।

काठमाडौं उपत्यका ट्राफिक कार्यालयले आइतबार बिहान गरेको जाँचमा स्कुल बसका पाँच जना चालकले मादक पदार्थ सेवन गरेको पाइएको डीआईजी मिरा चौधरीले बताइन् ।

‘हामीले रेन्डम्ली जाँच गरेका थियौँ । तीमध्ये पाँच जना चालकले मापसे गरेको पाइयो’, चौधरीले भनिन् । त्यसपछि उनीहरुलाई कारबाही गरिएको थियो । स्कुल बस सन्चालनलाई व्यवस्थित बनाउने कामलाई आफुले प्राथमिकता दिइएको उनले बताइन् ।

‘बालबालिका बोकेर हिँड्ने भएकाले यसलाई व्यवस्थित र सुरक्षित गर्नुपर्छ भन्ने हो’, उनले भनिन् । ट्राफिक कार्यालयले केही साताअघि प्याब्सन, एन–प्याब्सनलगायतलाई बोलाएर छलफल गरेको थियो ।

स्कुल बसहरुको सहज सन्चालन र नियमानुसारको व्यवस्थापनका लागि छलफल भएको बताइएको छ ।

डीआईजी चौधरीले नियमविपरित सन्चालन हुने स्कुल बसलाई कारबाही गरिने बताइन् । ‘सिट क्षमताभन्दा बढी विद्यार्थी राख्ने, झ्यालमा डन्डी नराख्नेहरुलाई कारबाही गरिने छ । हामीले उहाँहरुलाई बोलाएर जानकारी पनि दिइसकेका छौँ । अहिले सांकेतिक कारबाहीहरु भइरहेको छ । बिस्तारै सबैलाई नियम मान्नु हुने छ भन्ने लाग्छ’, उनले भनिन् ।