परिवार भित्रैको बर्बर अपराध: बैतडीमा बाबुको हत्या, अछाममा श्रीमती मारिइन्

कैलाली । अछाममा एक श्रीमानले श्रीमती र बैतडीमा छोराले बुवाको हत्या गरेका छन् । अछामको पन्चदेवल विनायक नगरपालिका ७ पुल्लेतोला दोम्सीगाडा बस्ने ४० वर्षीय मान्या विकको श्रीमानको कुटाइबाट ज्यान गएको हो ।

उनलाई श्रीमान् ४८ वर्षीय पहेलु कामीले बन्चरो प्रहार गरि हत्या गरेको प्रहरीले जनाएको छ । श्रीमतीको हत्या गरेर श्रीमान फरार भएको र उनको खोजी भइरहेको प्रहरीले जनाएको छ ।

अछाममा श्रीमतीको हत्या गरेको घटना सेलाउन नपाउँदै बैतडीमा आफ्नै छोराले बुवाको हत्या गरेका छन् । बैतडीको डिसालैनी ५ सेरामा शुक्रबार बिहान बन्चरो प्रहार गरि छोराले बुवाको हत्या गरेका हुन् ।

२१ बर्षिय लोकेन्द्र जोशीले ७० वर्षीय बुवा अन्तरामको हत्या गरेको जिल्ला प्रहरी कार्यालय बैतडीका प्रहरी निरीक्षक लोकराज जोशीले जानकारी दिए । हत्या गर्ने छोरालाई पक्राउ गरि थप अनुसन्धान गरिरहेको प्रहरीले जनाएको छ ।