हनी ट्रयाप प्रकरण: एकै व्यक्तिसँग दोस्रो किस्ता लिने क्रममा यसरी समातिए दम्पती

काठमाडौं । हनी ट्रयापको आरोपमा पक्राउ परेका एक दम्पती एउटै व्यक्तिसँग दोस्रोपटक रकम लिन लाग्दा पक्राउ परेको खुलेको छ । स्रोतका अनुसार ती व्यक्तिसँग दोस्रो किस्ताको ५ लाख रुपैयाँ लिने क्रममा उनीहरु पक्राउ परेका हुन् ।

‘पहिलो लटमा एक लाख रुपैयाँभन्दा बढी दिइएको रहेछ । दुई किस्तामा रकम दिने सहमतिअनुसार दोस्रो किस्ताको रकम बुझाउने बेला पीडितले हामीलाई खबर गरेका हुन्’, अनुसन्धानमा खटिएका एक प्रहरी अधिकारीले भने ।

पक्राउ पर्नेमा सोलुखुम्बुको नेचासल्यान गाउँपालिका- ३ स्थायी घर भई भक्तपुरको बालकोट बस्दै आएका २४ वर्षीय शेखर बास्तोला र २० वर्षीया रोजिना राउत रहेका छन् । काठमाडौं उपत्यका अनुसन्धान कार्यालयको टोलीले उनीहरुलाई पक्राउ गरेको हो । प्रहरीका अनुसार उक्त दम्पती तीन वर्षदेखि सँगै बस्दै आएका छन् ।

राउतले सामाजिक सञ्जालहरूमा पुरुषहरूसँग साथी बनेर अश्लील कुरा गर्ने र त्यसैलाई आधार बनाएर बास्तोलाले बार्गेनिङ गर्ने गरेको प्रहरी अधिकारी बताउँछन् । ‘युवतीले केटाहरुसँग नजिकिएपछि दुईबीच अश्लील कुराकानी हुने र त्यसैलाई आधार बनाएर बास्तोलाले असुली गर्ने गरेको पाइयो’, प्रहरी अधिकारीले भने।

पक्राउ परेका दम्पती काठमाडौंमा अरु काम के गर्छन् भन्नेबारे प्रहरीले केही बताएको छैन । काठमाडौं उपत्यका अनुसन्धान कार्यालयकै टोलीले दुई साताअघि पनि हनी ट्रयापको आरोपमा एक दम्पतीलाई पक्राउ गरेको थियो ।