गुफा पोखरी र मेन्छ्यायेम डाँडाको सिजनल र अफ-सिजनल दृश्य

इटहरी । तेह्रथुमको तीनजुरे, संखुवासभाको मिल्के र ताप्लेजुङको जलजले डाँडाहरुको समष्टि क्षेत्रलाई टीएमजे भनेर चिनिन्छ । टीएमजेलाई गुराँसको राजधानी मानिन्छ ।

नेपालमा पाइने ३२ प्रजातिका गुराँसमा २८ प्रजाति यही क्षेत्रमा पाउने वातावरणसम्बन्धी काम गर्ने अन्तर्रास्ट्रिय संस्था आईयूसीएनले गरेको अध्ययनले देखाएको छ । यही टीएमजे क्षेत्रको डाँडैडाँडा तेह्रथुमको बसन्तपुर बजारबाट करिब डेढ घण्टा सवारी यात्रामा गुफा पोखरी पुगिन्छ ।

गुफा पोखरी आकाश खुलेको र खासगरी दशैं-तिहारपछिका केही महिना गुफापोखरीबाट मकालु, कञ्चनजंघा, कुम्भकर्ण हिमाल देखिन्छ । पोखरीमा हिमश्रृंखला डुबुल्की मारेको देख्न सकिन्छ ।

मेन्छ्यायेम डाँडाबाट प्रदेश १ का सबैजसो जिल्ला देखिन्छ । हिमश्रृङ्खलादेखि तराईका मैदानसम्म देखिन्छ । सूर्योदय हेर्ने मुकाम त हुँदै हो  ।तर, यही क्षेत्रमा असार-साउनको झरी हुने मौसममा भने गुफा पोखरी र मेन्छ्यायेम डाँडा दुवै हुस्सुमा लुक्छन् । बेलाबेला तिनीहरुले अनुहार देखाए पनि हिमालहरुले हत्तपत्त मुहार बादल खोलेर निकाल्दैनन् ।

२,८९० मिटर उचाइमा रहेको गुफा पोखरी लुक्ला (२,८५० मिटर) भन्दा अग्लो छ । मेन्छ्यायेम झन अग्लो छ । मेन्छ्यायेमको आधार शिविरको सुके बजारको उचाइ नै २,९१० मिटर रहेको आईयूसीएनले उल्लेख गरेको छ ।

सुके बजारको आधार शिविरबाट झन्डै एक घण्टा उकालो हिँडेपछि मेन्छ्यायेम चुचुरो पुगिन्छ । यसको उचाइ तीन हजार बढी छ ।