ओलीले भने – हामीले गरेको काम २० वर्षमा अरूले गर्न सकेनन् (भिडिओ)
काठमाडौँ । नेकपा एमालेका अध्यक्ष केपी शर्मा ओलीले एमाले सरकारले गरेको काम अरूले २० वर्ष सम्ममा पनि गर्न नसकेको टिप्पणी गरेका छन् ।
राष्ट्रिय युवा संघ नेपाल केन्द्रीय कमिटीको बैठक तथा प्रशिक्षण समारोहको उद्घाटन सत्रमा उनले कांग्रेसले अहिले सम्म एमालेको जस्तो काम गर्न नसकेको बताएका हुन् ।
‘हामीले धेरै काम गरेका थियौँ । २० वर्षमा अरूले गर्न नसेका काम हामीले गरेका हौँ’ उनले भने ‘ नेपाली कांग्रेसले २१ वर्ष सम्म केहि नयाँ योजना केही विचार ल्याउन सकेन ।’
उनले नेपाली कांग्रेस कुनै रचनात्मक काम गर्न नसक्ने पार्टी भएको समेत आरोप लगाए ।
‘हाम्रो समृद्ध नेपाललाई हाँगो बटारेर कांग्रेसले समुन्नत नेपाल बनायो’ उनले भने ‘सही कामको शत्रु हो कांग्रेस । ’
उनले एमाले सरकारले गरेको थुप्रै कामहरूको प्रचार हुन नसकेकोमा गुनासो गरेका थिए ।
‘गएको निर्वाचनमा हामीले गरेका काम पर्याप्त रूपमा जनतामा सामु लैजान सकेनौँ आगामी निर्वाचनमा त्यस्तो हुन दिन हुन्न । गएको निर्वाचनमा गठबन्धनवालाहरूले प्रहरी प्रशासन सबै राज्य संयन्त्रहरुको दुरुपयोग गरे हाम्रा विरुद्ध प्रयोग गरे अबको निर्वाचनमा हामीले हुन दिन हुँदैन’ उनले भने, ‘त्यो कमी सच्चाउनै पर्छ ।’
अध्यक्ष ओलीले आगामी निर्वाचनमा स्थानीय तहको निर्वाचनमा जस्तो कमजोरी नगर्न सुझाव दिएका थिए । उनले आगामी निर्वाचनमा राष्ट्रिय युवा संघ अझै सशक्त हुनु पर्ने बताए । टोल टोलमा राष्ट्रिय युवा संघ पुग्नु पर्ने ओलीले बताए । त्यहाँ पुगेर आफ्नो संगठन निर्माण गर्न सुझाव दिए ।