खोला ओगटेर काम नगर्ने १६ सय मेगावाट बराबरका विद्युत आयोजनाको पीपीए रद्द गरिने (भिडिओ)

काठमाडौं । ऊर्जामन्त्री पम्फा भुसालले लाइसेन्स लिएर काम सुरू नगरेका जलविद्युत् आयोजनाको पीपीए रद्द गरिने बताएकी छन् ।

नेपाल आर्थिक पत्रकार समाज (सेजन) ले आइतबार काठमाडौंमा आयोजना गरेको कार्यक्रममा उनले करिब १६ सय मेगावाट बराबरका आयोजनाहरूको विद्युत खरिद सम्झौता (पीपीए) भएर पनि निर्माण हुन नसकेको जानकारी गराइन् ।

खोला/नदी ओगटेर बस्ने प्रवृत्तिलाई निस्तेज गर्ने गरी कदम चाल्दैछौं । टेक अर पे प्रावधानमा पीपीए गरिएका आयोजनाहरू सुरू नहुँदा वित्तीय जोखिमसमेत देखिएकोले मन्त्रालयले चाँडै आवश्यक निर्णय गर्नेछ’, मन्त्री भुसालको भनाइ थियो ।

उनका अनुसार नेपाल विद्युत् प्राधिकरणले पीपीए गरेका करिब ३ हजार २ सय मेगावाटका जलविद्युत् आयोजनाहरू निर्माणाधीन अवस्थामा छ । सरकारले प्रस्ताव गरेको नयाँ विद्युत ऐनले विद्युत व्यापार तथा प्रसारण खुल्ला पहुँचको व्यवस्था गरेको उनले बताइन् ।

कार्यक्रममा प्राधिकरणका कार्यकारी निर्देशक कुलमान घिसिङले सवै औधोगिक क्षेत्रलाई पर्याप्त विद्युत उपलब्ध गराइएको र प्राधिकरणको ध्यान आन्तरिक खपत बढाउनेमा नै केन्द्रित रहेको बताए । ट्रान्समिसन र सवस्टेशन बनाउनका लागि लगानी बढाउने घिसिङले अहिले विद्युतीय गाडीको प्रयोगलाई बढावा दिनुपर्नेमा जोड दिए ।

ट्रान्समिसन लाइनको अभावका कारण कुनै पनि आयोजनाको विद्युत खेर जाने अवस्था नरहेको उनको दाबी थियो ।