अर्थमन्त्रीको सुरक्षामा कडाइ (तस्बिरहरू)

काठमाडौं । अर्थमन्त्री जनार्दन शर्मा सहभागी हुने सार्वजनिक कार्यक्रमहरूमा सुरक्षा व्यवस्था कडा बनाउन थालिएको छ ।

मङ्गलवार अनामनगरको संवाद डबलीमा आयोजित कार्यक्रममा सहभागी हुन पुगेका अर्थमन्त्री बाक्लो सुरक्षा घेरामा थिए । अनामनगरबाट डबलीसम्म जाने बाटो, गल्लीहरूमा धेरै संख्यामा प्रहरीहरू तैनाथ गरिएका थिए ।

अखिल नेपाल किसान महासंघ (क्रान्तिकारी केन्द्र) द्वारा आयोजित ३०औँ किसान सहिद दिवस तथा ६९ औँ भीमदत्त पन्त स्मृति दिवसको उपलक्ष्यमा आयोजित कार्यक्रममा सहभागी हुन अर्थमन्त्री शर्मा त्यहाँ पुगेका थिए ।

बजेट निर्माणमा अनधिकृत व्यक्तिको संलग्नतामा करका दर हेरफेर गराएको आरोप लागेपछि राजीनामा दिएका मन्त्री शर्मा आइतबार मात्रै मन्त्री नियुक्त भएका थिए ।

संसदीय विशेष छानबिन समितिले अर्थमन्त्री विरुद्ध लागेका आरोप प्रमाणित नभएको प्रतिवेदन बुझाएपछि उनी पुनः अर्थमन्त्रीको जिम्मेवारीमा फर्किएका थिए ।

सोमबार मात्रै नेपाल यूथ कांग्रेसले संसद् भवन अगाडि नै अर्थमन्त्रीविरुद्ध प्रदर्शन गर्दै कालोझण्डा देखाएका थिए ।