स्रोत नखुलेको झण्डै ५० लाखसहित कपन भृकुटी चोकबाट एकजना पक्राउ

काठमाडौं । काठमाडौं महानगरपालिका-६ तिनचुली बगला मार्गबाट स्रोत नखुलेको ४९ लाख ५० हजार ५० रूपैयाँसहित एकजना पक्राउ परेका छन् ।

पक्राउ पर्नेमा गोरखा चुमनुब्री गाउँपालिका-१ घर भएका २४ वर्षीय धावा घ्याल्चेन छन् ।

काठमाडौं महानगरपालिका-६ भृकुटी चोकबाट बा.९९ प ७२०४ नम्बरको मोटरसाइकलमा सवार घ्याल्चेनलाई स्रोत नखुलेको नगद ३२ लाख ५० रूपैयाँ सहित फेला पारी प्रहरी प्रभाग कपनबाट खटिएको प्रहरीले पक्राउ गरेको थियो ।

अनुसन्धानको क्रममा प्रहरीले उनको कोठाबाट थप १७ लाख ५० हजार रूपैयाँ बरामद गरेको हो ।

प्रहरी प्रभाग कपनका कार्यालय प्रमुख प्रहरी निरीक्षक कृष्ण वस्याल र ट्राफिक प्रहरी प्रभाग कपनका कार्यालय प्रमुख प्रहरी सहायक निरीक्षक नवराज सापकोटाको कमाण्डमा खटिएको संयुक्त प्रहरी टोलीले सवारी चेकजाँच गर्ने क्रममा सो रकम फेला परेको प्रहरीले जनाएको छ ।
तिनचुली बंगलामार्गस्थित उनको डेरबाट थप रकम फेला परेको समेत प्रहरीले जनाएको छ ।