विशाल सिमेन्टका सञ्चालकमाथि मुद्दा दायर, प्रहरीको रायभन्दा कडा मागदाबी

काठमाडौं । शंकास्पद कारोबारको आरोपमा पक्राउ परेका व्यवसायी अमित श्रेष्ठमाथि जिल्ला अदालतमा आज मुद्दा दायर भएको छ । प्रहरी हेडक्वाटरले समेत चासो दिएको यस प्रकरणमा काठमाडौं प्रहरीले दिएको रायभन्दा फरक मागदावीसहित जिल्ला सरकारी वकिलको कार्यालयले मुद्दा हालेको हो ।

उनी विशाल सिमेन्टका सञ्चालक ४१ वर्षीय श्रेष्ठ गत असार २९ गते पक्राउ परेका थिए । नुवाकोटको विदुर नगरपालिका स्थायी घर भई काठमाडौं महानगरपालिका–२ पानीपोखरी बस्दै आएका उनको परिवारका अधिकांश सदस्य क्यानडामा छन् । विदेशी मुद्रा कारोबारमा शंकास्पद भूमिका देखिएको भन्दै प्रहरीले श्रेष्ठलाई पक्राउ गरेको हो ।

सुरुमा प्रहरीबाट अभद्र व्यवहारसम्बन्धी कसुरमा नियन्त्रणमा लिइएका श्रेष्ठको मोबाइल र ल्यापटप परिक्षण गर्दा विदेश मुद्रा विनिमय कसुर गरेको भन्दै त्यससम्बन्धी अनुसन्धान अगाडि बढाइएको थियो । अनुसन्धान सकेर शुक्रबार जिल्ला सरकारी वकिल कार्यालयलाई प्रतिवेदन पठाएको थियो ।

प्रतिवेदनमा प्रहरीले बैंक तथा वित्तीय संस्था सम्बन्धी ऐन, २०७३ को दफा १०३ को उपदफा घ अनुसार सजाय माग गर्न सरकारी वकिल कार्यालयलाई राय दिएको छ । उक्त उपदफामा इजाजतबिना विदेशी विनिमय सम्बन्धी कारोबार गर्न नहुने र त्यसो गरेमा विगो जफत गरी विगोबमोजिम जरिवाना र एक वर्षसम्म कैद हुन सक्ने व्यवस्था रहेको छ ।

तर, सरकारी वकिल कार्यालयले राष्ट्र बैंक ऐन २०५८ को दफा ९५ अनुसार मागदाबी लिएर अभियोगपत्र दर्ता गरेको काठमाडौं जिल्ला सरकारी वकिल प्रमुख गंगाप्रसाद पौडेलले जानकारी दिए । यसले प्रहरीको रायभन्दा कडा सजायको माग गर्छ ।

यस दफाअनुसार प्रचलित कानुन बमोजिम बैंकबाट इजाजतपत्र नलिइ विदेशी मुद्राको कारोबार गरेमा सम्बन्धित विगो जफतसहित बिगोको तीन गुणासम्म जरिवाना वा ७ वर्षसम्म कैद वा दुवै सजाय हुने व्यवस्था रहेको छ ।

श्रेष्ठको सम्पत्ति स्रोतमाथि आशंका गर्दै प्रहरीले क्रिप्टोमा लगानी गरेको हुन सक्ने अनुमान गरेको छ । काठमाडौं जिल्ला प्रहरीको हिरासतमा राखेर अनुसन्धान गरिएपछि प्रहरी प्रधान कार्यालयले समेत यसमा चासो दिएको थियो ।

अनुसन्धान प्रतिवेदन सरकारी वकिल कार्यालयलाई पठाउने तयारी भइरहँदा प्रधान कार्यालयले डीएसपी गोविन्द थापालाई पठाएर मिसिल हेर्न लगाएको थियो । जिल्ला वा कुनै युनिटमा दर्ता भएको मु्द्धामा प्रधान कार्यालयले प्रतिनिधि पठाएर हेर्न लगाउनुलाई अस्वभाविक मानिन्छ ।

काठमाडौं प्रहरी परिसरका अनुसार श्रेष्ठको कमन वेल्थ बैंक अफ अष्ट्रेलियाबाट एक लाख ९४ हजार २ सय ८५ अष्ट्रेलियन डलर र रोयल बैंक अफ क्यानडाबाट एक लाख ८७ हजार ४ सय २१ क्यानेडियन डलर कारोबार भएको देखिएको छ । यस्तै रोयल बैंक अफ क्यानडाबाट सेयर कारोबारसमेत देखिएको प्रहरीको दावी छ ।

श्रेष्ठको एभरेष्ट बैंकबाट २ करोड ६ लाख ६ हजार ६ सय ९२ र एनआइसी एसियाबाट ६५ लाख २४ हजार ९ सय १० रुपैयाँ कारोबार देखिएको प्रहरीले जनाएको छ । यस्तै, नबिल बैंकमा ६७ हजार ५ सय ९६ क्यानेडियन डलर र ६५ लाख नेपाली रुपैयाँ रहेको पाइएको छ । उनको कलंकी र लाजिम्पाटमा जग्गा छ ।

स्रोतका अनुसार श्रेष्ठलाई नियन्त्रणमा लिएपछि प्रहरीलाई म्याद लिन जिल्ला अदालत काठमाडौंबाट निकै गाह्रो भएको थियो । श्रेष्ठ प्रहरीभित्र परिचित व्यवसायी हुन् । केही वर्षअघि एक महिला ठगी सम्बन्धी कसुरमा पक्राउ परेपछि उनी प्रहरीमाझ चर्चामा आएका थिए ।

श्रेष्ठकै उजुरीपछि ती महिलालाई पक्राउ गर्न खोज्दा धेरैपटक माथिबाट दबाब आएर प्रहरी ‘ब्याक’ भएको स्रोत बताउँछ । पछि श्रेष्ठले उल्टै ती महिलासँग ठुलो रकम तिरेर केस मिलाएको बताइन्छ । धेरै प्रहरीसँग ती महिलाको राम्रो चिनजान रहेको अधिकारीहरु बताउछन् ।