औद्योगिक क्षेत्रले उठाउन सकेन करोडौं बक्यौता, नतिर्नेमा क्याप्टेन थापादेखि प्रचण्डका भाञ्जासम्म

हेटौँडा । हेटौँडा औद्योगिक क्षेत्रको जग्गा भाडामा लिएर राजनीतिक दलका केही नेताको आडमा र पहुँचवालाहरूले बक्यौता नतिरेको पाइएको छ ।

देशकै ठूलो हेटौँडा औद्योगिक क्षेत्रमा रहेको जग्गा कब्जा गरेर सरकारलाई भाडा नतिर्ने सूचीमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ का भान्जादेखि औद्योगिक क्षेत्र व्यवस्थापन लिमिटेडकै पूर्वमहाप्रबन्धकसम्म छन् । उनीहरूले जग्गा भाडाको सम्झौता गरेर उद्योग नखोली जग्गा कब्जा गरेर बसेका छन् । जसका कारण नयाँ उद्योग खोल्न आउनेले जग्गासमेत अभाव भएको छ ।

औद्योगिक क्षेत्र छाडे पनि ती उद्योगहरूको नाममा बक्यौता रहेको देखिएको कार्यालयले जनाएको छ । कार्यालयले उपलब्ध गराएको सूचीअनुसार भाडा नतिर्ने सूचीमा व्यवसायी तथा सञ्चार उद्यमी क्याप्टेन रामेश्वर थापा र औद्योगिक क्षेत्र व्यवस्थापन लिमिटेड, बालाजुका पूर्वमहाप्रबन्धक नन्दकिशोर बस्नेत पनि छन् । केही बहुराष्ट्रिय उद्योग पनि रहेको औद्योगिक क्षेत्र व्यवस्थापन कार्यालयले जनाएको छ ।

प्रचण्डका भान्जा गोकुल भण्डारीले असार मसान्तसम्म ५५ लाख ५५ हजार ४ सय २२ रूपैयाँ नतिरेको पाइएको छ । भण्डारी सञ्चालक रहेको साउथ एसियन ब्रुअरी इण्डस्ट्रिज प्रालिले बियर उत्पादनका लागि २०७३ सालमा जग्गा सम्झौता गरेको थियो । १०५ रोपनी जग्गा कब्जा गरेका भण्डारीले न भाडा तिरेका छन् न त उद्योग नै सञ्चालन गरेका छन् ।

क्याप्टेन थापा थापाले व्यावसायिक साझेदार नेकपा एमाले दैलेखका उपाध्यक्षसमेत रहेका नन्दकिशोर बस्नेतको संयुक्त परियोजना क्वालिटी ह्याचरीले ४३ लाख ६८ हजार ७ सय ३४ रुपैयाँ भाडा हालसम्म तिरेका छैनन् । उनीहरूले औद्योगिक क्षेत्रको जग्गा २०६४ सालबाट कब्जा गरेका छन् । अझ ह्याचरीले भाडा तिर्न नपर्ने दाबी गर्दै दायर मुद्दा उच्च अदालत पाटन इजलासमा विचाराधीन छ ।

औद्योगिक क्षेत्रमा रहेको बहुराष्ट्रिय कम्पनी एसियन पेन्ट्स (नेपाल) प्रालिको नाममा १५ लाख २४ हजार ६ सय ४३ रूपैयाँ, कृषि सामग्री कम्पनी लि (राष्ट्रिय बीउ बिजन कम्पनी प्रालि) को असार मसान्तसम्म ३१ हजार ८ सय ४४ रूपैयाँ, हेटौँडा दुग्ध वितरण आयोजनाको नाममा ४ लाख ६७ हजार ९६५ रुपैयाँ बक्यौता छ । क्षेत्रीय खाद्य प्रविधि तथा गुण नियन्त्रण कार्यालयले २ लाख ५२ हजार २ सय ७९ रुपैयाँ बक्यौता तिर्न बाँकी रहेको कार्यालयका सूचना अधिकारी दीपक आचार्यले बताए ।

आचार्यको अनुसार आर्थिक वर्ष २०७८/७९ को असार मसान्तसम्म विभिन्न उद्योगहरूको नाममा कुल ५ करोड ७९ लाख ५४ हजार १ सय ४ रूपैयाँ बक्यौता छ । लिमिटेडले पटक-पटक ताकेता गर्दा पनि बक्यौता रकम उठ्न सकेको छैन् । उद्योगीहरूले हेटौँडा औद्योगिक क्षेत्रको वार्षिक प्रतिरोपनी ८ हजार ३ सय ३१ रूपैयाँ तिर्दै आएका छन् । हेटौँडा औद्योगिक क्षेत्रमा हाल १४८ वटा उद्योग सञ्चालनमा छन् । चारवटा जति बन्द अवस्थामा छन् ।