उत्तेजित हर्क साम्पाङ फेसबुक लाइभमा : बालेनलाई चारैतिरबाट प्रहार गर्न आग्रह (भिडिओ)

काठमाडौं । धरानका चर्चित मेयर हर्क साम्पाङ फेसबुक लाइभमा आएर आफ्ना विरोधीहरूप्रति आक्रोश पोखेका छन् । उनले फेरि एकपटक काठमाडौंका मेयर बालेन साहप्रति कठोर टिप्पणी गरे ।

धरानमा पनि फोहोरको समस्या रहेको भनेर हिजो एक रिपोर्ट प्रशारण गर्ने टेलिभिजनमाथि साम्पाङ खनिएका थिए । उनले फोहोर थुपार्ने ल्यान्डफिल्ड साइटको दृष्य देखाएर भ्रम पैदा गर्न खोजिएको आरोप लगाए । धरानका सडकमा कतै पनि फाहोर नभएको उनको दाबी थियो ।

आफू काठमाडौं गएर फोहोर सोहोर्नका लागि सबैलाई झक्झक्याएर आएको साम्पाङले बताए । बालेनलाई लक्षित गर्दै उनले भने, ‘जाबो बाटोको फोहोर सोहोर्न नसक्नेले, नेपालको क्यापिटल सिटीलाई डुङडुङ बनाउनेहरुले ठूलो गफ गरेर हुन्छ ?’

साम्पाङले फेसबुक लाइभमा अमर्यादित शब्दहरू पनि प्रयोग गरेका थिए । उनको भनाइ जस्ताको तस्तैः

काठमाडौं गइयो । काठमाडौंभरि बिजोक रहेछ । सडकको फोहोरसम्म उठाउन नसक्ने साथीहरूलाई काम गर है भनेको, अहिले ए केके भनेर गीत गाउँदैछन् । एउटा जी लेखेको मिडिया रैछ । त्यसले धरानमा पनि फोहोरको समस्या रैछ भनेर रिपोर्ट बनाएछ ।

हाम्रो ल्यान्डफिल साइटमा गएर खिचिएको रहेछ । बाटोउँधि त फोहोर छैन । बाटोमा फोहोर फाल्नेलाई फाइन तिराइहाल्छौं । जहाँनिर थुपार्छौं, जंगलको बीचमा त्यहाँ गएर एउटाले फुटेज बनाएछ, धरानमा पनि फोहोर छ भनेर । कहाँ छ धरानमा फोहोर ? नहुने कुरा गर्ने ?

सत्यलाई स्वीकार्न नसकेर साथीहरुमा जुन एकखालको भाको छ… मलाई अचम्म लाग्छ । काठमाडौंमा गएर हामीले केही कुरा भनिसकेपछि, मैले एउटा स्टाटस लेखिसकेपछि नै हो राष्ट्रिय युवासंघका साथीहरू भोलिपल्टदेखि जुट्नुभयो । निकै राम्रो काम गरिरहनुभएको छ । त्यहाँ गन्हाएर बसेका थिए साथीहरु । लहै काम गर है भनेको यो.. त्यो… भन्छन् ।

म चुनौती दिन्छु । काठमाडौंको फोहोर सोहोरिसकेपछि मात्रै बोल्नुहोला । यो काठमाडौंको फोहोर सोहोर्ने दायित्व नगरपालिकाको मात्रै पनि होइन । मन्त्रालयहरुलाई पनि भन्या छु मैले । मन्त्रीहरुले पनि हेर्नुपर्छ । सबैले मिलेर गर्ने हो । गर है… भनेको हे…हे…हे… अर्कै बुभ्नुभयो । खैर केही छैन । साथीहरूलाई लागेको कुरा गर्नुभो । तर, सत्य कुरा स्वीकार्नुपर्छ । हिनताबोध गर्नुहुँदैन ।

धरानमा फोहोर छ भनेर साथीहरूले भन्नुभो । कुन गल्लीमा छ मलाई भन्नुहोला । ५ मिनेटमा उठाउन लगाउँछु । हैट, हाम्रो कहाँ त्यस्तो हुन्छ ? ल्यान्डफिल साइटमा हेरेर हुन्छ ? त्यहाँ त फाल्ने नै हो । इटहरी दुर्घन्धित भयो रे । झूटो समाचार बनाएर दिग्भ्रमित नगर्नुहोला । म
मिडियाकर्मीहरूलाई भन्न चाहन्छु । फेसबुक चलाउन भनेर करोड रूपैयाँ छुट्याउनेहरूले केही त गरेका होला । अब तपाईं त्यो नगर्नुस् । नहुने नहुने कुरा नगर्नुस् । हुने कुरा गर्नुस् । सत्य कुरा स्वीकार्नुस् ।

जाबो बाटोको फोहोर सोहोर्न नसक्नेले, नेपालको क्यापिटल सिटीलाई डुङडुङ बनाउनेहरुले ठूलो गफ गरेर हुन्छ ? नहुने कुरा । सप्पैजनालाई भन्न चाहन्छु । जबसम्म फोहोर उठ्दैन मेरो प्रहार भइरहन्छ । त्यो शहर तपाईंहरूको मात्र होइन, हामी सबैको राजधानी हो । टुरिष्ट त्यो बाटो हुँदै आउने हो । गन्हाइरहेको छ भने को आउँछ ? नहुने कुरा ।

साथीहरूलाई म भन्न चाहन्छु । फोहोरमा फोहोरी राजनीति नगर्नुहोला । तपाईंहरु सबैलाई यही भन्न चाहन्छु । काम गरौं न । फोहोर सोहोरौं । सरसफाइ गरौं । कसैसँग आग्रह पुर्वाग्रह केही छैन मेरो । न कुनै दललाई न कुनै व्यक्तिलाई भन्नु छ । फोहोर सोहोर्नुपर्‍यो, काम हुनुपरो । फेसबुकमा मुख बजाउने साथीहरू काठमाडौंमा हुनुहुन्छ भने राष्ट्रिय युवा संघसँग जानुस् । युवाहरूले गरिराख्नुभएको छ । गन्हाउने फोहोरलाई डङ कि डङ हातले उ गरिराख्नुभएको छ । काम गर्नु छैन हावामा करायो, बस्यो । त्यो नगर्नुहोला ।

सबैलाई भन्न चाहन्छु । तपाईंहरू रचनात्मक हुनुस् । सत्यलाई स्वीकार्नुस् । फोहोरलाई फोहोर भन्नुस् । धरानले कसरी म्यानेज गरेको छ सिक्नुस् । शहरी विकासमन्त्री मेटमणि चौधरी पनि हेर्न आए । हामी फोहोरबाट ग्यास निकाल्दैछौं । मल बनाउँदैछौं । सिक्नु छैन, इगो हार्ट हुने ।

विशेषगरी यो लाइभ मेरो विरोधीहरूलाई है । तपाईंहरूको विरोधले हुन त के ख्यास्छ र ख्यास्न त होइन ? केही पनि ख्यास्दैन । म त आफ्नो बाटोमा हिँड्ने मान्छे हो । तर, मेरो विरोधले तपाईंहरुलाई निकै पोल्दोरहेछ । जुन दिनसम्म काठमाडौंको फोहोर सोहोरिँदैन, सफा हुँदैन, तबसम्म धरानले मात्र होइन चारैतिरबाट प्रहार गर्नुपर्छ त्यहाँ । काम न काजकाहरू ।