मोरङको सीमावर्ती क्षेत्रबाट २ वटा पेस्तोलसहित दुईजना पक्राउ

काठमाडौं । मोरङको सुनवर्षी नगरपालिका- ८ खरेबारी सीमाबाट सशस्त्र प्रहरीले दुईवटा पेस्तोलसहित दुईजना पक्राउ गरेको छ ।

को. २७ प ४०६ नम्बरको मोटरसाइकलमा भारतबाट नेपालतर्फ आउँदै गरेका सोही ठाउँका २८ वर्षीय आरिफ आलम पक्राउ परेको एपीएफले जनाएको छ ।

उनको साथबाट अटोमेटिक चाइनिज पेस्तोल एक वटा म्याग्जिन तथा एक राउण्ड गोली र एउटा सिक्सर पेस्तोल बरामद भएको छ । आलमले उक्त पेस्तोल उर्लाबारी नगरपालिका-६ बस्ने २९ वर्षीय नविन धिमालले मगाएको बताएपछि धिमाललाई पनि पक्राउ गरिएको सशस्त्रले जनाएको छ ।

धिमालको साथबाट ४७ हजार ७ सय ७० नेपाली रूपैयाँ र दुई थान मोबाइल सेट बरामद गरिएको सशस्त्रको भनाइ छ ।