गठबन्धनमा गलफत्ती- नेकपा एसको मत साढे ४ लाख कि ९ लाख २७ हजार ?

काठमाडौं । नेकपा एकीकृत समाजवादीका अध्यक्ष माधवकुमार नेपालले स्थानीय तह निर्वाचनमा आफ्नो पार्टीले ९ लाख २७ हजार मत पाएको दाबी गरेका छन् । आज पार्टीको पूनर्गठन दिवसमा आयोजित सभालाई सम्बोधन गर्दै उनले आफ्नो पार्टीले २७ प्रतिशत स्थानमा उम्मेदवारी दिएर ९ लाख २७ हजार भोट पाएको दाबी गरे ।

‘जनताको समर्थनको कुरा गर्ने ९ लाख २७ हजार भोट पाएका छौं,’ उनले भने, ‘यत्रो जनताको समर्थन पाएको पार्टीलाई कसैले पनि अवमूल्यन गर्न खोज्छ भने त्यसले ख्याल गरोस् । हामी मूकदर्शक भर्एर बस्ने पार्टी होइन ।’

हिजोको बालुवाटारको बैठकमा पनि आफ्नो पार्टीको हैसियत १५ देखि २० लाख मतको रहेको बताएको उनले बताए । ‘हिजोमात्रै बालुवाटारमा छलफल हुँदैथियो । उनीहरूले हाम्रो पार्टीको मतसंख्या साढे चार लाख, चारलाख २७ हजार, पाँचलाख साँढे ५ लाख भन्दैथिए । हामीले तर्क राख्यौ तपाईले जोडेको हिसाबकिताब गलत छ ।’

पोखरामा नेकपा एसले जित्दा एउटा वडा पनि उठ्न नदिएको बताउँदै ‘के हामीले मतै पाएका थिएनौं ?’ भनेको उनले बताए । उनले भने, ‘६० हजार पाएको हाम्रो मेयरको मत हटाएर यो संख्या हटाएर हुन्छ ? मान्न सकिन्छ ? भनेपछि कुरा त ठिकै हो भन्दै थिए ।’

सो बैठकमा २७ प्रतिशत उम्मेदवार उठाउँदा ९ लाख २७ हजार भोट पाएको पार्टीले सबै ठाउँमा उठाए १५ देखि २० लाख पाउने हैसियत रहेको प्रष्ट पारेको बताए ।
‘त्यतिमत पाए १५ देखि २० सीट हामीलाई कोही राख्न सक्दैन्,’ उनले भने, ‘अब हामीले समानुपातिकले पनि हैसियत देखाउनु पर्दछ ।’

उनले निर्वाचन आयोगको तथ्यांकमा त्रुटि रहेको पनि बताएका छन् । आयोगको प्रतिवेदनअनुसार नेकपा एसका वडाध्यक्षका उम्मेदवारहरूले ४ लाख २२ हजार ७३७ मत पाएका छन् ।