भाजपा नेतृ सोनाली फोगाटको बलात्कारपछि हत्या भएको आशंका, दुईजना पक्राउ

काठमाडौं । भारतीय जनता पार्टीकी नेतृ तथा टिकटक स्टार सोनाली फोगाटको मृत्‍यु प्रकरणले नयाँ मोड लिएको छ ।

४२ वर्षीय फोगाटको अगस्ट २२ मा गोवामा मृत्‍यु भएको थियो । प्रहरीले सुरुमा फोगाटको हृदयाघातका कारण मृत्‍यु भएको हुन सक्ने आशंका व्यक्त गरेको थियो भने फोगाटका परिवारले उनको हत्या गरिएको आशंका व्यक्त गरेका थिए ।

यद्यपी पोस्टमोर्टमका क्रममा उनको शरीरमा ‘कैयौँ चोट’ पाइएपछि प्रहरीले उनको बलात्कारपछि हत्या गरिएको हुन सक्ने आशंकामा दुई जनालाई पक्राउ गरेको छ । फोगाटका परिवारले उनकै सहयोगीहरुले उनको हत्या गरेको आरोप लगाएका थिए ।

उनका दुईजना निजी सहयोगीको नाम लिँदै सोनाली फोगाटका भाइले ती सहयोगीहरूले भिडिओ बनाएर ब्ल्याकमेल गर्ने गरेको आरोप लगाएका थिए । उनले फोगाटको बलात्कारपछि हत्या भएको दाबी गरेका छन् ।