एमालेलाई साइजमा ल्याउन गठबन्धनः मेटमणि चाैधरी

रुपन्देही । शहरी विकासमन्त्री मेटमणि चौधरीले नेकपा एमालेले कानुनी राज्यको धज्जी उडाउँदै संसदीय प्रणालीमा वितृष्णा ल्याउने काम गरेकाले बाध्य भएर अन्य दलसँग गठबन्धन गर्नुपरेको दावी गरेका छन् ।

उनले नेकपा एमालेका अध्यक्ष केपी ओलीले पटक–पटक संविधानलाई विघटन गरेर मुलुकमा अराजकता फैलाउने काम गरेकाले संविधान विरोधी तत्वहरुबाट देश बचाउन पनि सबै पार्टीहरु एकजुट हुनुपरेको जिकिर गरे ।

रिपोर्टर्स क्लव नेपाल लुम्बिनीले बुटवलमा शनिबार बिहान आयोजना गरेको साक्षात्कारमा बोल्दै मन्त्री चौधरीले मुलुकमा संविधानलाई संस्थागत विकास गर्नको लागि गठबन्धन दलहरु विजयी हुनुपर्ने दावी गरेका छन् । मंसिरमा हुने चुनावपछि मुलुक नयाँ कोर्षमा जाने उनले बताएका छन् ।

नेकपा एसका पोलिटब्यूरो सदस्य रहेका चौधरीले मुलुक सम्बृद्धिको बाटोमा अघि बढिरहेको बेला फेरी मुलुकमा गोलचक्करमा पार्ने काम भएको भन्दै त्यसलाई चिर्न गठबन्धन आवश्यक रहेको बताएका हुन् ।

उनले शहरी विकास मन्त्री चौधरीले शहरी नीति विकास २०६४ पारित गर्ने तयारीमा रहेको बताउदै जनतालाई उपभोक्ता मार्फत विकास निर्माणका काममा जोडेर अगाडि जाने नीति सरकारको रहेको बताए ।

नेकपा एमालेका उपाध्यक्ष विष्णु पौडेलले पटक–पटक बुटवलको बदनाम गरेको आरोप लगाउदै यो निर्वाचनबाट पौडेललाई पत्तासाफ गर्ने ठोकुवा गरे । पौडेल बालुवाटार प्रकरणदेखि विभिन्न गलत तत्वहरुसँग साँठगाँठ गरेको उनको आरोप थियो ।

रुपन्देही क्षेत्र २ नं मा विष्णु पौडेलसँग नेकपा एसका नेता राजु गुरुङ्ग भिड्ने घोषणा गर्दै उनले यो निर्वाचनबाट गठबन्धनले सबै स्थानमा विजयी हुने दाबी गरे ।