कांग्रेस र नेकपा एसले सरुवा गर्न खोजेको प्रमुख प्रशासकीय अधिकृत आचार्यको आरोप, मेयर लेख्छन्- सचिव को रहेछ त ?

कैलाली । घोडाघोडी नगरपालिकाका प्रमुख प्रशासकीय अधिकृत दीपक आचार्यले नेपाली कांग्रेस र नेकपा एकीकृत समाजवादी पार्टी आफ्नो सरुवा गराउन लागिपरेको आरोप लगाएका छन् ।

उनले सामाजिक सञ्जालमा विगत एक महिनादेखि आफ्नो सरुवाको लागि कांग्रेस र एकीकृत समाजवादी पार्टी शक्ति केन्द्र धाइरहेको आरोप लगाएका हुन् ।

‘नेपाली कांग्रेस र नेकपा समाजवादीका साथीहरु विगत १ महिनादेखि लगातार मेरो सरुवा गर्न विभिन्न राजनीतिक शक्ति केन्द्रमा धाइरहनु भएको छ’, उनले लेखेका छन्, ‘तपाईंहरू थाक्नुभएकै हो भने म मार्ग प्रशस्त गर्न तयार छु है !’

घोडाघोडी नगरपालिकामा मेयर नेकपा एकीकृत समाजवादी र उपमेयर नेपाली कांग्रेसबाट निर्वाचित छन् । उनले दुइटै पार्टीलाई आफ्नो सरुवामा लागेको आरोप लगाएका हुन् ।

आचार्यको स्ट्याटसमा नगर प्रमुख खडक रावतले कमेन्ट पनि गरेका छन् । ‘समाजवादीको को सचिव रहेछ त ?’, उनले प्रश्न गरेका छन् ।

रावत नेकपा एकीकृत समाजवादीका जिल्ला सचिव पनि हुन् । प्रमसख प्रशासकीय अधिकृत आचार्यले कांग्रेस र नेकपा एकीकृतबाट सरुवाको लागि जोड भइरहेको आरोप लगाउँदा नगर प्रमुखले आफू जिल्लाको सचिव रहेको सङ्केत दिएका हुन् ।