चोरी भएर हराएको मोटरसाईकलसहित दुई जना पक्राउ

काठमाडौं । चोरी भएर हराएको मोटरसाईकलसहित ललितपुरबाट दुई जनालाई प्रहरीले पक्राउ गरेको छ । पक्राउ पर्नेमा मकवानपुर घर भइ हाल ललितपुरको धापाखेल बस्दै आएका भुवन डिमडुङ र मकवानपुर घर भई सोही ठाउँ बस्दै आएका महेशकुमार रानामगर रहेका छन् ।

भुवनले शंकाश्पद अवस्थामा चलाएको प्रदेश ३ ०२ ००७ प ६६ ३० नम्बरको रातो एनएस पल्सर मोटरसाइकल फेला पारी अनुसन्धान गर्ने क्रममा उक्त मोटरसाइकल महेशले दिएको भनि खुल्न आएपछि उनलाईसमेत प्रहरीले पक्राउ गरेको काठमाडौ उपत्यका ट्राफिक प्रहरी कार्यालयका प्रवक्ता एवं प्रहरी वरिष्ठ उपरीक्षक (एसएसपी) राजेन्द्रप्रसाद भट्टले जानकारी दिए ।

काठमाडौ उपत्यका ट्राफिक प्रहरी कार्यालयबाट खटिएको प्रहरी टोलीले सोमबार अपरान्ह साढे ४ बजे ललितपुरबाट उक्त मोटरसाईकलसहित दुबै जनालाई पक्राउ गरेको हो । पक्राउ परेका दुबै जनालाई मोटरसाईकलसहित थप अनुसन्धान तथा कारवाहीका लागी प्रहरी बृत बौद्ध पठाईएको छ । गत बैशाख १७ गते बौद्धस्थित नारायणटारबाट हराएको भनि काठमाण्डौको ढोकाटोल बस्ने जुनिलमान श्रेष्ठले प्रहरी कार्यालयमा निवेदन दिएका थिए ।

हराएका सवारी साधन खोजतलास र चोरी नियन्त्रण कार्य निरन्तर हुदै आएको तर स्वयं सवारी धनी पनि बिशेष चनाखोका साथै सजक हुनुपर्ने र सवारी चालक थप जिम्मेवार बनि सुरक्षित स्थानमा मात्र पार्किङ गर्न, अतिरिक्त लक तथा सुरक्षाका उपायहरुको समेत प्रयोग गर्न प्रवक्ता भट्टले अनुरोध गरेका छन् । सवारी साधन हराएको थाहा पाउनासाथ ट्राफिक प्रहरीको हटलाईन नम्बर १०३, नेपाल प्रहरीको हटलाईन नम्बर १०० मा फोन गरेर जानकारी दिन सकिने साथै नजिकको प्रहरी कार्यालयमा निवेदन दिन सकिने उनको भनाई छ ।