बार आरोपित ‘बिचौलिया’ सँग अध्यक्षको संवाद- ममात्र होइन गठबन्धन छ, महाअभियोगमा धेरै पोलिटिक्स भएको छ (अडिओ)

काठमाडौं । नेपाल बार एसोसियसनका अध्यक्ष गोपालकृष्ण घिमिरेले प्रधानन्यायाधीश चोलेन्द्र शमसेर जबराविरुद्धको महाअभियोगमा धेरै ठूलो राजनीति घुसेको भन्दै बारले उनीविरुद्ध महाअभियोग समितिमा बुझाएको ३५ बुँदे कथित प्रमाण पनि आफूले संकलन र मस्यौदा नगरेको बताएका छन् ।

बारले दुई दिनअघि राणाविरुद्धका प्रमाण भन्दै ३५ बुँदामा विभिन्न व्यक्तिको नाम तोकेर कल डिटेलसमेत आफूसँग रहेको जसरी फर्जी अभियोगहरु पेश गरेको छ । सो फर्जी प्रमाणको १७ बुँदामा बिचौलियाका रुपमा प्रस्तुत गरिएका दीपक तिमल्सिनासँग अध्यक्ष घिमिरे स्वयंले बारमा आफूमात्र नरहेको भन्दै गठबन्धनको परिबन्धमा परेको आशय व्यक्त गरेका छन् ।

बारले महाअभियोग सिफारिस समितिसमक्ष दीपक तिमल्सिनासहितका ‘बिचौलिया’को सम्पत्ति छानबिन गरी पाउँ भन्दै उनीहरुलाई चोलेन्द्र शमशेरको मतियारका रुपमा प्रस्तुत गरिएको छ । तिमल्सिनाले आफ्नो नाम विनाप्रमाण किटेको गुनासो गर्न अध्यक्ष घिमिरेलाई गरेको टेलिफोन रेकर्ड नेपाल प्रेसलाई प्राप्त भएको छ । जसमा अध्यक्ष घिमिरेले उल्टै आफू गठबन्धनको बन्धक भएको भन्दै महाअभियोगमै राजनीति घुसेको स्वीकार गरेका छन् ।

उनले बारमा आफूमात्र नरहेको र गठबन्धन पनि रहेको भन्दै यसबाट ब्याक हुँदा आफू बारको गेटभित्र पस्ने अवस्थासमेत नरहेको लाचारी व्यक्त गरेका छन् । यसबाट बारको उक्साहटमा भएको कामु प्रधानन्यायाधीश दीपक कार्की नेतृत्वको हड्ताल र त्यसपछिको महाअभियोगको सिलसिलामा बारभन्दा माथि अर्को रिमोट कन्ट्रोल रहेको देखिन्छ । अध्यक्ष घिमिरे स्वयंले महाअभियोगमा राजनीति भएको भन्नु र कथित प्रमाणहरु पनि अरुले नै मस्यौदा गरेको भन्नुले नेपाल बार ‘साँझको बार’ मा परिणत भएको प्रस्ट हुन्छ ।

बारले लगाएका आरोपले एकातिर चोलेन्द्रलाई प्रहार गर्न खोजिए पनि जुन जुन फैसलाको प्रसंग ल्याइएको छ, त्यसमा सर्वोच्च अदालतकै अरु धेरै न्यायाधीशसमेत मुछिन्छन् । केही सीमित न्यायाधीशलाई जोगाएर बारले सबै न्यायाधीशमाथि महाअभियोग सिफारिस समितिसमक्ष नैतिक प्रश्न उठाएको टिप्पणी भइरहेको छ ।

यस्तो छ बारले किटान गरेका ‘बिचौलिया’ दीपक तिमल्सिनासँग बार अध्यक्ष गोपालकृष्ण घिमिरले गरेको संवादको अडियो :

दीपक :- गोपाल सर नमस्ते है म दीपक तिमल्सिना ।

गोपालकृष्ण :- हजुर

दीपक :- कुरा गर्न मिल्छ कि ?

गोपालकृष्ण :- हजुर भन्नुस् त !

दीपक :- म त हजुरसँग सोध्न खोजेको । यसो न्युज पनि हेरें । हजुर जस्तो सम्मानित व्यक्तिले चाहिँ यसरी नामै लेखेर पठाइदिसेछ । केही छ कि हजुर । मलाई त अलिक नमज्जा लागेर । हजुरसँगै डाइरेक्ट कुरा गरौं भनेर गरेको ।

गोपालकृष्ण :- होइन बुझें मैले । यो विषयमा यस्तो छ, अब यो विभिन्न सोर्स छ बारमा होइन ? ममात्रै बारमा छैन तपाईंले बुझ्नुभाछ । अब त्यसैले गर्दा अहिले त बार चलाउँदा खेरी अनेकथरि कुरा छ नि त फेरि ! गठबन्धन भन्ने छ । तपाईंले बुझ्नै भएको छ । बाँकी त जे कुरा छ, त्यो हिसाबले होइन भन्ने कुरा प्रमाणित हुँदै जाला नि त ! त्यही ढंगले लिनुस् तपाईंले पनि ।

दीपक :- तैपनि कस्तो भने एटलिस्ट नामै त्यसरी नलेखिदिएको भए हुन्थ्यो कि प्रमाण भएको भए हुन्थ्यो ।

गोपालकृष्ण :- हो, नाम लेख्यो भनेर अलिकति अब्जेक्सन भाछ । त्यस्तो होइन भनेर क्लियर गर्न पनि त पाइयो नि फेरि गुमसुम रहनुभन्दा । सधैं भित्रभित्रमात्रै भन्ने, बाहिर नआउने । बारले कहिले डिस्क्लोज गर्ने भन्ने थाहा छैन भन्ने भइरहेको थियो । डिस्क्लोज गर्ने भन्ने भइसकेपछि अब यस्तो छैन, मेरो यस्तो छैन भन्न त पाइयो नि त ! चोलेन्द्र श्रीमानलाई पनि त्यो भयो अब । फलानो फलानो चीजहरु यो होइन भन्न त पाइयो नि त !

दीपक :- तर, एउटा चाहिँ मलाई लागेको, जुन डेमोक्रेटिक पार्टीलाई उहाँले सपोर्ट गर्नुभयो होइन ? हुन त यो त अनेकथरि पोलिटिक्सहरु भाछन् । त्यो के भन्नु के नभन्नु !

गोपाल कृष्ण :- यसमा धेरै पोलिटिक्स भएको छ, बुझ्नुभएन ? अब हामी यस्तो वेलामा बारमा आएका छौं । हामी ब्याक हुनसक्ने स्थितिमै छैनौं । ब्याक हुनेबित्तिकै हामी बारको गेट छिर्न सक्दैनौं ।

दीपक :- मैले चाहिँ के बुझेको थिएँ भने हजुरले सायद त्यो ड्राफ्ट पनि गर्नुभएको होइन जस्तो लाग्छ ।

गोपालकृष्ण :- वास्तवमा बुझेँ मैले । ठीकै छ यो कुरा होइन भनेर सफाइ दिने मौका भो नि त ! त्यसैले अहिले यति नै करा गराैं । थ्याङ्क यू ।