सुदूरपश्चिममा नेकपा एस ‘खस्कियो’, प्रदेशसभामा यसकारण बन्दैछ माओवादी पहिलो दल

कैलाली । पाँच वर्षीय कार्यकाल सकिन भन्दा केही समय अगाडी सुदूरपश्चिम प्रदेशमा सबै भन्दा ठुलो दल माओवादी केन्द्र बन्ने भएको छ ।प्रदेशमा हाल सम्म सबै भन्दा ठुलो दल रहेको नेकपा एकीकृत समाजवादीका दुई जना प्रदेश सभा सदस्यहरू एमाले प्रवेश गरेसँगै माओवादी केन्द्र प्रदेशको सबै भन्दा ठुलो दल बन्ने पक्का भएको हो ।

एमालेबाट निर्वाचित भएर एमाले विभाजन हुँदा नेकपा एकीकृत समाजवादीमा सनाखत गरेका तारालामा तामाङ र कुलवीर चौधरीलाई एमाले अध्यक्ष केपी शर्मा ओलीले बुधवार एमालेमा स्वागत गरे ।दल अदलबदल गरेपछि उनीहरु दुबै जनाको पद जाने भएको छ । उनीहरुको पद जाँदा १४ जना सांसद सहित पहिलो दल रहेको नेकपा एकीकृत समाजवादी १२ जना सांसद सहित दोस्रो दल बन्ने छ ।

तामाङलाई कारबाही गर्न नेकपा एकीकृत सुदूरपश्चिम प्रदेश कमिटीले संसदीय दललाई निर्देशन दिइसकेको छ भने चौधरीको हकमा अझै कारबाही प्रक्रिया सुरु भएको छैन ।सुदूरपश्चिम प्रदेशमा नेकपा रहँदा माओवादी केन्द्रका पनि १४ सांसद थिए । एमाले र माओवादी पूर्ववत् अवस्थामा फर्किदा माओवादी केन्द्रबाट निर्वाचित झपट बोहराले एमाले रोजेपछि उनको पद गएको थियो । त्यसपछि १३ जना सांसदमा सीमित माओवादी केन्द्र अब पहिलो दल बन्ने भएको हो ।

सुदूरपश्चिम प्रदेशमा अहिले नेपाली कांग्रेसका ११ जना प्रदेश सभा सदस्य छन् । १२ जना प्रदेश सभा सदस्य रहेको नेपाली कांग्रेसमा पनि डडेल्धुराबाट निर्वाचित कर्ण मल्लले राजीनामा दिए पछि संख्या ११ मा सीमित भएको हो । अहिले कांग्रेस र एमालेका समान ११÷ ११ जना सांसद छन् ।नेकपा रहँदा २५ जना सांसद रहेको एमालेमा पार्टी विभाजन पछि सभामुख सहित ११ सांसद रहेका छन् । एमालेका १४ सांसदले नेकपा एकीकृत समाजवादीमा सनाखत गरेका थिए ।

यहाँ जसपा र लोसपाका पनि १/१ जना प्रदेश सभा सदस्य छन् । ५३ जना प्रदेश सभा सदस्य रहेको सुदूरपश्चिम प्रदेशमा थप दुई जना पद मुक्त हुँदा ४९ जनामा सीमित हुने देखिएको छ । अहिले सम्म माओवादीबाट निर्वाचित झपट बोहरा र कांग्रेसबाट निर्वाचित कर्ण मल्लको पद गइसकेको छ भने अब नेकपा एकीकृत समाजवादीमा सनाखत गरेर एमाले प्रवेश गरेका तामाङ र चौधरीको पनि दलको कार्यालयले सभामुखलाई पत्र पठाएपछि र सभामुखले संसद्लाई जानकारी गराएपछि पद जाने छ ।