भक्तपुर २ मा महेश बस्नेतका चुनावी कमाण्डरलाई उनैविरुद्ध उतार्दै नेकपा एस

भक्तपुर । नेकपा एकीकृत समाजवादी भक्तपुरले एमालेका पोलिटव्युरो सदस्य महेश बस्नेतका दुईवटा चुनावका कमाण्डरलाई उनैविरुद्ध उम्मेदवार सिफारिस गरेको छ । २०७४ सालमा भएको प्रतिनिधिसभा निर्वाचनमा भक्तपुर क्षेत्र नं २ बाट महेश बस्नेत निर्वाचित भएका थिए । त्यसवेला उनका चुनावी कमाण्डर थिए श्यामसुन्दर बस्नेत ।

२०७० सालमा भएको दोस्रो संविधानसभा निर्वाचन पहिलोपटक भक्तपुर क्षेत्र नं २ मा उम्मेदवार बनेका महेश बस्नेत तेस्रो भएका थिए । उक्त चुनावमा पनि श्याम बस्नेत महेशका चुनावी कमाण्डर थिए ।

उक्त चुनावमा कांग्रेसका रामेश्वर ढुंगेल विजयी हुँदा नेपाल मजदुर किसान पार्टीका सुनिल प्रजापति दोस्रो स्थानमा रहेका थिए । तेस्रो रहेका बस्नेतले करिब १६ हजार मत ल्याएका थिए ।

तर, २०७४ सालमा भएको प्रतिनिधिसभा निर्वाचनमा बस्नेतले कांग्रेसका हेभीवेट उम्मेदवार एवं पूर्वसभामुख दमननाथ ढुंगानालाई करिब दोब्बर मतले हराए । एमाले-माओवादी केन्द्रका गठबन्धन उम्मेदवार बस्नेतले ३६ हजार ४१२ मत ल्याउँदा ढुंगानाले १८ हजार ६८७ मात्रै पाएका थिए ।

एमाले छाडेका श्यामसुन्दर अहिले एकीकृत समाजवादीको भक्तपुर जिल्ला अध्यक्ष छन् । उनको नाम क्षेत्र नं २ बाट एकल सिफरिस गरिएको हो । नेकपा एमालेबाट भक्तपुर क्षेत्र नं २ मा महेश बस्नेत पुनः दोहोरिने निश्चित जस्तै छ । तर, सत्ता गठबन्धन भए मंसिर ४ बस्नेतलाई जित्न त्यति सहज छैन ।

‘हामीले निर्वाचन कमाण्ड नसम्हालेको भए २०७० को चुनावमा करिब १६ हजारमात्रै आएको मत २०७४ मा कसरी ३६ हजार हुन्छ’, श्यामसुन्दरले भने भने, ‘२०७० को संविधानसभामा निर्वाचनमा भएका कमीकमजोरी सुधारेर २०७४ मा निर्वाचन जित्न सफल भएका थियौं ।’

तर, आफूहरुले गरेको योगदानलाई बिर्सेर सांसद बस्नेत एक्लै अघि बढेको र उल्टै आफ्ना सहयोगीलाई पाखा लगाउन सक्रिय भएपछि अहिले पार्टी नै फरक फरक भएको उनको गुनासो छ ।

महेश बस्नेतलाई जिताउन सक्नेले हराउन पनि सक्ने जिल्ला अध्यक्ष बस्नेतको जिकिर छ । ‘उहाँलाई २०७० सालको संविधानसभा निर्वाचनकै हालतमा पुर्‍याउन केही गाह्रो छैन’, उनले भने, ‘हिजो जिताउन सक्नेले आज हराउन पनि सक्छ ।’

वैशाख ३० गते सम्पन्न स्थानीय तह निर्वाचनअन्तर्गत क्षेत्र नं २ मा रहेका मध्यपुर थिमि र सूर्यविनायक नपामा सत्ता गठबन्धनका वडा अध्यक्षहरुले पाएको मत २७ हजार ६२९ रहेको छ । एमालेका वडा अध्यक्ष उम्मेदवारहरुले भने २४ हजार १४५ मत ल्याएका छन् ।

क्षेत्र नं १ बाट दुईजना सिफारिस

नेकपा एस भक्तपुरले बस्नेतसँगै मंसिर ४ गते हुने प्रतिनिधिसभा तथा प्रदेशसभा सदस्य निर्वाचनका लागि अन्य उम्मेदवार सिफारिस गरेको छ ।

भक्तपुरबाट प्रतिनिधिसभाको प्रत्यक्षतर्फ ३ र समानुपातिकतर्फ १ तथा प्रदेशसभाको प्रत्यक्षतर्फ ६ र समानुपातिकतर्फ ९ जनाको नाम सिफारिस गरिएको छ ।

प्रतिनिधिसभा प्रत्यक्षतर्फ क्षेत्र नं १ मा डा. राजेन्द्र कोजू र विनोद केसीको नाम सिफारिस गरिएको छ । प्रतिनिधिसभाको समानुपातिकतर्फ ओमचरण अमात्य एकजनाको मात्रै नाम सिफारिस गरिएको अध्यक्ष बस्नेतले जानकारी दिए ।

प्रदेशसभाको प्रत्यक्षतर्फ क्षेत्र नं १ (क) बाट रामप्रसाद न्यौपाने र (ख) बाट रामगोपाल चौगुठीको एकल नाम सिफारिस गरिएको छ । क्षेत्र नं २ (क) बाट डा. ध्रुवराज विष्ट र दिलीप केसी तथा (ख) बाट प्रेमानन्दलाल श्रेष्ठ र श्याम चौलागाईंको नाम उम्मेदवारमा सिफारिस गरिएको छ ।

प्रदेशसभाको समानुपातिकतर्फ क्षेत्र नं १ (क) बाट शान्ति खड्का र विष्णु कायस्थ तथा (ख) बाट रीता अवाल, माइलाबाबु देउला र एनबी दुमरुको नाम सिफारिस गरिएको छ । क्षेत्र नं २ (क) बाट चित्रबहादुर अछामी र शाेभा श्रेष्ठ तथा (ख) बाट सुशीला सुवेदी, भवानी खड्का र दुर्गामोहन श्रेष्ठको नाम सिफारिस गरिएको अध्यक्ष बस्नेतले जानकारी दिए ।

ब्याक भए पोलिटव्युरो सदस्य श्रेष्ठ

पार्टीका पोलिटव्युरो सदस्य राजेन्द्रमान श्रेष्ठ अहिले बागमती प्रदेशसभामा सांसद छन् । भक्तपुर क्षेत्र नं २ (ख) का प्रत्यक्षतर्फ निर्वाचित श्रेष्ठ आगामी निर्वाचनको लागि जिल्लाबाट कुनै पनि पदमा सिफारिस भएनन् । उनी आफैले यसपटक भक्तपुरमा कुनै पद दावी नगर्ने बताएअनुसार श्रेष्ठको नाम सिफारिस नगरिएको जिल्ला अध्यक्ष बस्नेतले जानकारी दिए ।

उनका अनुसार पोलिटव्युरो सदस्य श्रेष्ठले पुनः उम्मेदवार बन्न चाहेको भए उनको एकल नाम सिफारिस हुन्थ्यो । सत्ता गठबन्धनको समझदारीअनुसार पनि श्रेष्ठको पद सुरक्षित छ । सत्ता गठबन्धनभित्र २०७४ सालको निर्वाचनमा जसले जितेको हो उसैलाई यसपटक सीट खाली गर्ने भन्ने आन्तरिक सहमति छ ।

भक्तपुरमा प्रदेशसभातर्फ एक सीट सुरक्षित नेकपा एसले गठबन्धनमा २ क्षेत्रमा दाबी गरेको छ । त्यस्तै माओवादीले पनि प्रदेशसभातर्फ २ वटै क्षेत्र मागेको छ ।