माधव नेपालको दाबी- कांग्रेस र माओवादीभन्दा पहिले गणतन्त्रको आन्दोलन हामीले थाल्यौं

काठमाडौं । नेकपा एकीकृत समाजवादीका अध्यक्ष माधवकुमार नेपालले कांग्रेस र माओवादीभन्दा पहिले आफूले गणतन्त्रको निर्णय गरेर अभियान अघि बढाएको दाबी गरेका छन् ।

मार्क्सवादी ज्ञान केन्द्रले आइतबार आयोजना गरेको कार्यक्रममा अध्यक्ष नेपालले २०६२/६३ को जनक्रान्तिलाई गणतन्त्रमा लैजान तत्कालीन नेकपा एमालेको तर्फमा आफूले आँट गरेको बताए ।

नेपालले भने, ‘गणतन्त्र ल्याउन विभिन्न पार्टीभित्र बहस भयो । कांग्रेस गणतन्त्रमा जान मानेको थिएन । माओवादी गणतन्त्रवादी भए पनि कहिले सांस्कृतिक राजा, कहिले के केका कुरा चलिरहेका थिए । तत्कालीन एमाले हाम्रो पार्टीभित्र पनि विवाद भयो । २०६२ असार र साउनमा बसेको केन्द्रीय कमिटी बैठकले गणतन्त्रको दिशामा जाने निर्णय गरेको हो । कांग्रेस सँगै जान मानेन । हामीले बुटवलबाट एक्लै आन्दोलन अघि बढायौं ।’

उनले जनताबाट अनुमोदिन हुन कम्युनिष्ट पार्टीले कहिल्यै अनुदार बन्न नहुने बताए ।