एमाले अध्यक्ष ओलीको शैली सक्रिय राजाको भन्दा कम छैनः मुख्यमन्त्री पाण्डे

हेटौंडा । बागमती प्रदेशका मुख्यमन्त्री राजेन्द्र पाण्डेले नेकपा एमालेका अध्यक्ष केपी शर्मा ओलीको शैली सक्रिय राजाको भन्दा कम नरहेको बताएका छन् ।

एकीकृत समाजवादीको भ्रातृ संगठन युवा संघ नेपालको महाकाली-मेची युवा जागरण अभियानलाई हेटौंडामा स्वागत गर्दै मुख्यमन्त्री पाण्डेले ओलीको शैली राजतन्त्र सम्झाउने खालको भएको बताएका हुन् ।

उनले भने, ‘नेकपा एकीकृत समाजवादी ओलीको गलत प्रवृत्ति र ओली फालिसकिएको राजतन्त्र बनेपछि जन्मिएको पार्टी हो र समाजवाद जन्माउने हामी नै हौं ।’

एमालेमा अब राजतन्त्रको अवशेषमात्र बाँकी रहेको भन्दै संविधानको मर्मलाई कुल्चेर संविधानविरोधी काम गरेकै कारण एमालेको राजतन्त्रबाट समाजवादीहरु बाहिरिएको मुख्यमन्त्री पाण्डेको भनाइ थियो ।

एमालेमा देखिएको राजतन्त्रको कारण जनता वाक्क भएको बताउँदै उनले आउँदो निर्वाचनमा एमालेको हालत नाजुक हुने समेत दाबी गरे ।

बागमती प्रदेश सरकारले समाजवादको झल्को दिने कार्यक्रमहरु अघि बढाएको उल्लेख गर्दै मुख्यमन्त्री पौडेलले अबको निर्वाचनमा समाजवादी पार्टी देशको प्रमुख शक्तिको रुपमा उदाउने बताए ।