खैरो हेराेइन र १० लाख नगदसहित ८ जना पक्राउ

काठमाडौं । नेपाल प्रहरीको लागू औषध नियन्त्रण व्युरोले अवैध लागू औषध खैरो हेरोइनसहित ८ जनालाई पक्राउ गरेको छ ।

ब्यूरोले मंगलबार काठमाडौंमा पत्रकार सम्मेलन गर्दै ४० दशमलव ५ ग्राम खैरो हेरोईनसहित ३ जना र २४७ ग्राम खैरो हेरोईनसहित पाँच जनालाई पक्राउ गरिएको जनाएको हो । पक्राउ पर्नेमा ललितपुर भैसिपाटी बस्ने प्रताप कार्की, फिदिम घर भएका भुवन विक र सो हि स्थान बस्ने देङ्ग हाङ्ग नेम्वाङ रहेका छन् ।

त्यस्तै, काठमाडौंको माकलबारीबाट उत्सव घिमिरे, दोर्ची शेर्पालाइ लागू औषध खैरो हेरोईनसहित पक्राउ गरिएको र थप अनुसन्धान गर्दा फुर्लामी शेर्पालाई सुकेधाराबाट पक्राउ गरिएको ब्यूरोका प्रहरी वरिष्ठ उपरीक्षक विकास राज खनालले जानकारी दिए ।

उनीहरुलाई लागू औषध बिक्री गर्ने झापाका अप्सरा राजबंशी र उनलाई पनि सप्लाई गर्ने नौसाद आलमलाई पनि झापा मेचिनगरबाट डिजिटल तराजुका साथै नगद रु १० लाख ४० हजारसहित पक्राउ गरिएको खनालले बताए । त्यस्तै, ब्यूरोले अवैध लागू औषध २५२ एम्पुलसहित चार जनालाई विभिन्न स्थानबाट पक्राउ गरिएको उनले जानकारी दिए ।

ब्यूरोले काठमाडौंका विभिन्न स्थानबाट दुई केजी गाँजासहित ३ जनालाई पक्राउ गरिएको जनाएको छ ।