सँगै युद्ध लडेका सिनियर साथीहरु एमालेमा छटपटिएर बसेका छन्, घर फर्काउँछौं: प्रचण्ड (भिडिओ)

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा विभाजनका बेला एमालेतिर लागेका पूर्वमाओवादी नेताहरुलाई घर फर्किन आह्वान गरेका छन् ।

बुधवार पार्टी कार्यालय पेरिसडाँडामा एमाले केन्द्रीय सदस्य टेकबहादुर बलम्पाकीसहित प्रदेश र जिल्लास्तरीय नेताहरुलाई माओवादीमा स्वागत गर्दै अध्यक्ष प्रचण्डले अरु सिनियर नेताहरुलाई पनि घर फर्काउने वातावरण बनाइने बताए ।

प्रचण्डले भने, ‘हिजो माओवादी आन्दोलनका धेरै सिनियर साथीहरु एमालेमा हुनुहुन्छ । उहाँहरु अहिले वडा पीडा, छटपटी र बेचैनीमा बाँचिरहनुभएको होला । चैन केही पनि छैन होला । त्यत्रो लडाइँमा सँगै लडेका साथीहरुले पक्कै पनि हाम्रो अभाव अनुभूत गर्नुभएको होला । ती सबै साथीरुलाई घर फर्किने वातावरण बनाउनुपर्छ ।’

प्रचण्डले एमालेबाट फर्किएर आउनेहरुलाई कुनै पनि पूर्वाग्रह नराखिने आश्वासनसमेत दिए ।