अर्घाखाँचीमा माओवादीका बलदेवको सिफारिसपछि डिलारामलाई तनाव
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/09/Khanal-Acharya-Maoist.jpg)
रुपन्देही । नेकपा माओवादीका सचिव चक्रपाणी खनाल बलदेवको नाम अर्का सचिव डिलाराम आचार्यको क्षेत्र अर्घाखाँचीबाट सिफारिस भएको छ ।
यसअघि कपिलवस्तुको क्षेत्र नं १ लाई निर्वाचन क्षेत्र बनाएका खनालले गठबन्धनमा कांग्रेसलाई छाड्नुपरेको अवस्थामा वैकल्पिक क्षेत्र खोज्दै अर्घाखाँचीमा पनि नाम पारेको भन्दै अर्का सचिव डिलाराम आचार्य निकट कार्यकर्ताहरु आक्रोशित बनेका छन् । बलदेव अहिले कपिलवस्तु १ बाट प्रतिनिधिसभा सदस्य छन् ।
कपिलवस्तु १ बाट उनीसहित ३ जनाको नाम केन्द्रमा सिफारिस भए पनि यहाँ कांग्रेस नेता दीपकुमार उपाध्यायले दाबी गरिरहेकाले कतै गठबन्धनमा छाड्नुपर्ने हो कि भन्ने त्रासमा खनाल पक्ष रहेको छ ।
खनालको दुवै जिल्लाबाट नाम सर्वसम्मत भने सिफारिस हुन सकेको छैन । कपिलवस्तुमा उनीसहित डोरप्रसाद उपाध्याय, कमल चुँदालीको नाम सिफारिस भएपनि चुँदालीले आफू अहिलेको निर्वाचन प्रणालीमा आर्थिक अवस्थाले लड्न नसक्ने बताएका छन् ।
अर्घाखाँचीबाट टोपबहादुर रायमाझीले माओवादी छाडेपछि त्यो खाडल पुर्न सचिव बनाइएका डिलाराम आचार्यले टिकट पाउने अपेक्षा गरिएपनि बलदेवको नामसमेत सिफारिसमा परेपछि उनको समूहले आशंका गर्न थालेको छ । यहाँबाट बलदेव, आचार्यसहित जाकिर हुसेनको नाम पनि सिफारिस भएको माओवादी अर्घाखाँचीले जनाएको छ ।
अर्घाखाँचीमा समानुपातिकतर्फ सुशिला श्रीपालीको एकल नाम सिफारिस भएको छ । प्रदेश सभा ‘क’ तर्फ ठाकुर कुमार बिक, पदम क्षेत्री, शोभाखर बन्जाडेको नाम सिफारिस भएको छ भने प्रदेश सभा ख मा बिबेक गैरे, टिकाबहादुर रेश्मी र भक्त बहादुर पुनको नाम सिफारिस भएको माओवादी अर्घाखाँचीले जनाएको छ ।