नेविसंघले प्रहरीमाथि ढुंगामुढा र विश्वविद्यालय तालाबन्दी गरेकोमा अखिल क्रान्तिकारीको विरोध

काठमाडौं । नागरिकता विधेयक राष्ट्रपतिबाट प्रमाणित हुन ढिला भएको भन्दै नेविसंघ सडक आन्दोलनमा उत्रिएको बेला सत्ता गठबन्धनकै अर्को घटक अनेरास्ववियु क्रान्तिकारीले भने नेविसंघको ढुंगामुढाले विद्यार्थी आन्दोलनमाथि प्रहार गरेको आरोप लगाएको छ ।

अखिल क्रान्तिकारीका उपाध्यक्ष जिपी मैनालीले नेविसंघको आन्दोलन,ढुंगामुढा र राष्ट्रपतिको पुत्ला जलाउने कार्यको निन्दा गर्दै यसले विद्यार्थी आन्दोलनको भविष्यमाथि ढुंगा बर्साएको टिप्पणी गरेका छन् । उनले नेविसंघबाट भएको विश्वविद्यालयको तालाबन्दीको समेत बिरोध गरेका छन् ।

मैनालीले भने, ‘नेविसंघले प्रहरी माथी होइन विद्यार्थी आन्दोलनको भविष्यमाथी ढुंगा बर्षाइरहेको छ । त्रिबिको तालबन्दी , त्रिचन्द्र अगाडी आज प्रहरीमाथि गरिएको ढुंगामुढाले बिध्यार्थी आन्दोलनमाथि थप कालो पोत्ने काम मात्र गर्छ । नेबिसंघका मित्रहरुलाई आन्दोलनको स्वरुप फेर्न ,रचनात्मक बनाउन र शैक्षिक मुद्दामा बढी केन्द्रित हुन अनुरोध गर्छु । आफ्ना गतिबिधीले आलोचना गर्नेहरुलाई थप बल नपुर्याउ ।’

नेविसंघले आइतबार राष्ट्रपतिको पुत्ला जलाउँदै प्रहरीमाथि आक्रमण गरेको थियो ।