माधव नेपालको चेतावनी- पार्टीभित्र व्यक्तिवादी चरित्र र गुटबन्दी देखिए कारबाही (भिडिओ)

काठमाडौं । नेकपा एकीकृत समाजवादीका अध्यक्ष माधवकुमार नेपालले पार्टीभित्र व्यक्तिवादी चरित्र र गुटबन्दी देखिए कारबाही गर्ने चेतावनी दिएका छन् ।

सोमबार पार्टी कार्यालय तीनकुनेमा आयोजित नेपाल मगर संघ (समाजवादी) को तेस्रो राष्ट्रिय भेलालाई सम्बोधन गर्दै अध्यक्ष नेपालले एमालेभित्र केपी ओलीमा व्यक्तिवादी चरित्र देखापरेकै कारण आफूहरुले विद्रोह गर्नुपरेको भन्दै एकीकृत समाजवादीमा कसैले व्यक्तिवादी चरित्र देखाए र गुटबन्दी गरे कारबाही गर्ने चेतावनी दिएका हुन् ।

उनले एकीकृत समाजवादी पुरातनवादी पार्टीभन्दा भिन्न पार्टी भएकोसमेत जिकिर गरे । यसअघि जनताले दिएको जनमतलाई एकाधिकारवादी बानीले मूल्याङ्कन गर्न नसक्दा कम्युनिष्ट पार्टी छिन्नभिन्न भएको नेता नेपालको भनाइ थियो ।

उनले पाँच दलको गठबन्धनले सरकारलाई अघि बढाउने काम गरेपछि नेपालको राजनीतिमा नयाँ परिस्थिति सिर्जना भएको बताए । पार्टीलाई जिल्ला–जिल्लामा विस्तार गरी आउने निर्वाचनमा पार्टीलाई भारी मतले जिताउने गरी तयारी गर्न उनले निर्देशनसमेत दिए ।