विवेकशील-साझाको रवीन्द्र मिश्र समूहसँग एकता गर्ने राप्रपाको औपचारिक निर्णय, भोलि सम्झौता हुन सक्ने
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/12/rajendra-rabindra.jpg)
काठमाडौं । राष्ट्रिय प्रजातन्त्र पार्टीले विवेकशील साझाको एउटा घटकसँग पार्टी एकता गर्ने औपचारिक निर्णय गरेको छ ।
पूर्वअध्यक्ष रवीन्द्र मिश्रको समूहसँग लामो समयदेखिको छलफललाई राप्रपाले टुंगोमा पुर्याएको हो ।
आज बसेको कार्यसम्पादन समितिको बैठकले मिश्रलाई वरिष्ठ उपाध्यक्ष बनाउँदै पार्टीमा स्वागत गर्ने निर्णय लिएको एक नेताले जानकारी दिए । उनका अनुसार सम्भवतः भोलि नै दुई पक्षबीच सम्झौता हुने छ ।
‘उहाँहरु तयार नै हुनुहुन्थ्यो, हाम्रो तर्फबाट पनि आज टुंगिएको छ । अध्यक्षले आजै रवीन्द्रजीसँग कुरा गरेर सम्भवतः भोलि एकता हुन्छ,’ ती नेताले भने ।
यसअघि मिश्रलाई अध्यक्षभन्दा दोस्रो वरियतामा रहने गरी सहअध्यक्ष बनाउने प्रस्ताव गरिएको थियो । तर, राप्रपाभित्र त्यसमा सहमति हुन सकेन । अहिले वरिष्ठ उपाध्यक्ष बनाउन भने सबैजना तयार भएका छन् । आजको बैठकमा कसैले पनि विमति नराखेको स्रोतको भनाइ छ ।
मिश्रसँगै विवेकशील–साझाबाट कति नेताहरू आउँछन् भन्ने प्रष्ट भएको छैन । तर, हालको केन्द्रीय समितिको झण्डै आधा हिस्सा आफूले ल्याउन सक्ने मिश्रको आशा छ । मिश्रसँग आउने अन्य नेताहरूको जिम्मेवारी पछि टुङ्ग्याइने छ ।