भक्तपुरमा कांग्रेसले टुङ्ग्याउन सकेन प्रदेश उम्मेदवार

भक्तपुर । मंसिर ४ मा हुने प्रतिनिधिसभा तथा प्रदेशसभा निर्वाचनका लागि नेपाली कांग्रेसले प्रदेश सांसद बन्ने उम्मेदवार अझै टुङ्गो लगाउन सकेको छैन । निर्वाचन तालिकाअनुसार आज उम्मेदवारी मनोनयन रहेको छ ।

भक्तपुरमा कांग्रेसले सत्ता गठबन्धनमा प्रतिनिधिसभातर्फ २ नम्बर क्षेत्र र प्रदेशसभातर्फ १ नम्बर क्षेत्रका क र ख तथा २ नम्बर क्षेत्रमा क पाएको छ ।
प्रतिनिधिसभातर्फ २ नम्बर क्षेत्रमा पार्टीले कांग्रेस भक्तपुर जिल्ला सभापति दुर्लभ थापाको नाम सार्वजनिक गरेको छ । तर,आफूले अहिलेसम्म टिकट हात नपारेको जिल्ला सभापति थापा बताउँछन् ।

त्यसैले कांग्रेसको भागमा परेको प्रदेशमा को को उम्मेदवार हुने भन्ने टुंगो नलागेको उनले जानकारी दिए ।प्रतिनिधिसभातर्फ दुई क्षेत्र रहेको भक्तपुरमा १ नम्बर नेकपा माओवादी केन्द्रको भागमा परेको छ । माओवादीले यहाँ पार्टीका जिल्ला संयोजक सुनिल गोथे वासुलाई टिकट दिएको छ ।

त्यस्तै प्रदेशसभातर्फ एक सीट पाएको नेकपा एकीकृत समाजवादीले पार्टीका पोलिटव्युरो सदस्य राजेन्द्रमान श्रेष्ठलाई नै दोहोराउने भएको छ । नेकपा एसले भक्तपुर क्षेत्र नम्बर २ ख पाएको हो । २०७४ को निर्वाचनमा श्रेष्ठले कांग्रेसका गणेशमान चक्रधरलाई पराजित गरेका थिए । एमालेबाट निर्वाचित श्रेष्ठ पार्टी विभाजित हुँदा नेकपा एसतर्फ लागेका थिए ।