एमालेका प्रस्तावित मुख्यमन्त्री खगराजले दर्ता गरे उम्मेदवारी

पोखरा । नेकपा एमालेका नेता खगराज अधिकारीले प्रदेश सभा निर्वाचनका लागि मनोनयन दर्ता गराएका छन् । कास्की क्षेत्र नम्बर १ ‘क’ मा चुनाव लड्न उनले मनोनयन दर्ता गराएका हुन् । अधिकारीको प्रस्तावकमा टिकाराम पंगेनी छन् भने समर्थकमा कालिदास सुवेदी छन् ।

अधिकारी गण्डकी प्रदेश सभामा मुख्यमन्त्रीको दाबेदारका रुपमा हेरिएका छन् । यसअघि एमालेबाट मुख्यमन्त्री बनेका एमाले उपमहासचिव पृथ्वीसुब्बा गुरुङलाई पार्टीले केन्द्रमा उठाएपछि उनी मुख्यमन्त्रीको दाबेदारीसहित प्रदेश झरेका हुन् ।

कास्की १ का प्रतिनिधिसभा उम्मेदवार मनबहादुर गुरुङ पनि खगराजसँगै गएर मनोनयन दर्ता गराएका छन् । गुरुङको प्रस्तावकमा वैनबहादुर अधिकारी क्षेत्री र समर्थकमा दिलिप न्यौपाने छन् ।

कास्की १ ‘ख’ का उम्मेदवार वेदबहादुर गुरुङ ‘श्याम’ ले समेत उम्मेदवारी दर्ता गराएका छन् । पदम पौडेलको प्रस्ताव र सूर्य बानियाँको समर्थनमा उनले उम्मेदवारी दर्ता गराएका हुन् ।