चुनावी मैदानमा एक दर्जनभन्दा बढी व्यवसायी

काठमाडौं । व्यवसायीहरुको सधैं हुने गरेको एउटै गुनासो हो, ‘सरकार व्यवसायी मैत्री भएन ।’ तिनैमध्ये कति व्यवसायीले संसदमा प्रवेश पाइसकेका छन् । तर, नीति निर्माणमा पुगेका ती व्यवसायी आफ्नो स्वार्थमा मात्रै व्यस्त रहने गरेको आरोप पनि छ ।

गुनासो गर्ने र अहिलेसम्म संसदमा छिर्न नपाएका केही व्यवसायी अहिलेचुनावी महाभिडन्तमा उत्रिएका छन् । उनीहरु नीति निर्माण गर्ने ठाउँमा पुग्ने दौडमा छन् । मंसिर ४ गते हुने प्रतिनिधिसभा चुनावको नतिजा आफ्नो पक्षमा पारे भने उनीहरु सांसद हुनेछन् ।

पछिल्लो समय राजनीतिप्रति सबै पेशा, धर्म र वर्गको आकर्षण बढ्दो छ । कलाकार, व्यवसायी, इञ्जिनियर सबै पेशाका मानिसको उम्मेदवारी दर्ताले राजनीतिप्रतिको आकर्षणलाई पुष्टि गर्छ ।

बालकृष्ण सिवाकोटी

व्यवसायी बालकृष्ण सिवाकोटीले नेकपा एमालेको तर्फबाट दोलखाबाट उम्मेदवारी दर्ता गराएका छन् । एमालेलेसिवाकोटीलाई प्रतिनिधिसभाको उम्मेदवार बनाएको हो । सिवाकोटी २०७३ मा लगानी बोर्डमा मनोनीत भएका थिए ।

मेगा बैंकका सञ्चालक समिति सदस्य सिवाकोटी कालिञ्चोक केवलकारका सञ्चालक पनि हुन् । करिब १ दर्जनभन्दा बढी उद्योग तथा व्यवसायमा उनको संलग्नता छ ।

उमेश श्रेष्ठ

व्यवसायी उमेश श्रेष्ठ चितवन क्षेत्र नम्बर २ बाट उम्मेदवार बनेका छन् । कांग्रेसका तर्फबाट उम्मेदवार बनेका श्रेष्ठ प्रधानमन्त्री कार्यालयका राज्यमन्त्रीसमेत हुन् । उनी कांग्रेसबाट समानुपातिक सांसद पनि थिए ।

२०७० सालमा समानुपातिक निर्वाचन प्रणालीमार्फत नेपाली कांग्रेसका तर्फबाट संविधानसभा सदस्य निर्वाचित उनले संसदको आर्थिक समिति र शिक्षा तथा स्वास्थ्य समितिको सदस्य तथा विभिन्न उपसमितिको संयोजक भएर काम गरेका थिए ।

व्यवसायीका रुपमा उनले शिक्षा, पर्यटन, ऊर्जा र बैंकिङ क्षेत्रमा लगानी गरेका छन् । निजी तथा आवासीय विद्यालय संगठन (प्याब्सन) र निजी उच्च माध्यमिक विद्यालयहरुको संगठन (हिसान) का पूर्वअध्यक्ष पनि हुन् उनी ।

विनोद चौधरी

पश्चिम नवलपरासी १ बाट कांग्रेसकै तर्फबाट अर्बपति विनोद चौधरीले उम्मेदवारी दिएका छन् । नेपाली उद्योगी, अर्बपति, राजनीतिज्ञ तथा समाजसेवी समेत रहेका चौधरीका विभिन्न व्यवसाय छन् । उनी चौधरी ग्रुपका अध्यक्ष तथा कार्यकारी प्रमुखसमेत हुन् ।

एलपी साँवा लिम्बू

वैदेशिक रोजगार व्यवसायी एलपी साँवा लिम्बूले झापा निर्वाचन क्षेत्र नम्बर ४ बाट उम्मेदवारी दर्ता गराएका छन् । नेकपा एमालेका तर्फबाट उम्मेदवार बनेका साँवा यसअघि पनि सांसद थिए । उनले पछिल्लाे समय वैदेशिक राेजगार व्यवसाय छाेडेर जलविद्युत तथा ऊर्जा क्षेत्रमा लगानी गरेका छन् ।

सुमनविक्रम पाण्डे

पर्यटन व्यवसायी सुमनविक्रम पाण्डेले नुवाकोट क्षेत्र नम्बर २ बाट उम्मेदवारी दर्ता गराएका छन् । राष्ट्रिय स्वतन्त्र पार्टीबाट उम्मेदवार बनेका पाण्डे प्रतिनिधिसभाका लागि नयाँ अनुहार हुन् ।

पाण्डे साहसिक पर्यटन, ट्राभल, हवाई सेवा, होटेल, रेष्टुराँलगायत विभिन्न विधाका व्यवसायका साथै ट्रेकिङ एजेन्टस एसोसियसन अफ नेपाल (टान) का अध्यक्ष, एयरलाइन अपरेर्टस एसोसियसन (आवान) को महासचिवसमेत हुन् । उनी नेपाल पर्यटन बोर्डको सदस्य, नेपाल पर्यटन वर्ष २०११ राष्ट्रिय कार्यसमितिको सदस्यलगायत विभिन्न व्यावसायिक नेतृत्वमा पुगिसकेका छन् ।

विक्रम पाण्डे

व्यवसायी विक्रम पाण्डे चितवन निर्वाचन क्षेत्र नम्बर ३ बाट उम्मेदवार बनेका छन् । उनी राप्रपाका तर्फबाट उम्मेदवार बनेका हुन् । पाण्डे नेता तथा व्यवसायी हुन् । उनी २०७३ सालमा पुष्पकमल दाहाल प्रचण्ड नेतृत्वको सरकारमा वनमन्त्री थिए । उनको कालिका कन्स्ट्रक्सन, कालिका एफएम, कालिका पावर कम्पनी र कालिका टावर रहेको छ ।

डा. वीरेन्द्र महतो

व्यवसायी डा. वीरेन्द्र महतोले जनता समाजवादी पार्टी (जसपा) का तर्फबाट सिरहा क्षेत्र नम्बर ४ मा प्रतिनिधिसभा सदस्यको प्रत्यक्षतर्फ उम्मेदवारी दिएका छन् । डा. महतो एनआरएनका संस्थापक अध्यक्ष उपेन्द्र महतोका भाइ हुन् । महतोको पनि आफ्नै विभिन्न व्यवसाय रहेको छ । उनी माछापुछ्रे बैंकका अध्यक्ष पनि हुन् ।

डा. सुनिल शर्मा

मेडिकल व्यवसायी डा. सुनिल शर्मा मोरङ निर्वाचन क्षेत्र नम्बर ३ बाट कांग्रेसतर्फका उम्मेदवार बनेका छन । डा. शर्मा अहिले ३ वटा मेडिकल कलेजका मुख्य लगानीकर्ता हुन् । विराटनगरको नोबल मेडिकल कलेज र काठमाडौंको काठमाडौं मेडिकल कलेजमा उनको लगानी छ ।

राजेन्द्र बजगाईं

पर्यटन व्यवसायी राजेन्द्र बजगाईं गोरखा निर्वाचन क्षेत्र नम्बर १ बाट उम्मेदवार बनेका छन् । कांग्रेसका तर्फबाट उनले उम्मेदवारी दिएका हुन् । पर्यटन व्यवसायी बजगाईंको १ अर्ब १६ करोड लगानीको होटल वर्णबास छ ।

पूर्णबहादुर तामाङ

निर्माण व्यवसायी पूर्णबहादुर (कान्छाराम) तामाङ रामेछापबाट कांग्रेसको तर्फबाट उम्मेदवार बनेका छन् ।

किसान श्रेष्ठ

व्यवसायी कृष्णकुमार श्रेष्ठ (किसान) ले बारा निर्वाचन क्षेत्र नम्बर ४ मा एकीकृत समाजवादीका तर्फबाट उम्मेदवारी दर्ता गराएका छन् । श्रेष्ठ यसअघि श्रम, रोजगार तथा सामाजिक सुरक्षामन्त्री थिए । किसान पूर्वम्यानपावर व्यवसायी हुन् भने जग्गाको कारोबारमा पनि सक्रिय थिए ।

दीपक खड्का

व्यवसायी दीपक खड्काले संखुवासभाबाट उम्मेदवारी दर्ता गराएका छन् । उनको पर्यटनका साथै जलविद्युतमा पनि लगानी छ । उनी कांग्रेस संखुवासभाका सभापतिसमेत हुन् ।

मोहन आचार्य

निर्माण व्यवसायी मोहन आचार्यले रसुवाबाट उम्मेदवारी दिएका छन् । कांग्रेसका तर्फबाट उम्मेदवार बनेका आचार्य यसअघि पनि सांसद थिए । उनको रसुवा कन्स्ट्रक्सन छ । उनी सांसद भएको बेला आफ्नो कम्पनीलाई अनुकूल हुने गरी मापदण्ड बनाएर लुम्बिनी प्रादेशिक अस्पतालको ठेक्का दिन लागेको आरोप छ ।

आकर्षण पोखरेल

व्यवसायी आकर्षण पोखरेल काठमाडौं निर्वाचन क्षेत्र नम्बर ७ बाट लौरो चिन्ह लिएर स्वतन्त्र उम्मेदवारी दर्ता गराएका छन् । पोखरेल केही वर्षअघि मात्र अमेरिकाबाट फर्किएका हुन् ।

हाल उनले एसियाकै पहिलो स्काइवाक टावर कमलादीमा निर्माण गरिरहेका छन् ।

देवीप्रकाश भट्टचन

प्रभु ग्रुपका अध्यक्ष देवीप्रकाश भट्टचन नेकपा एमालेका तर्फबाट समानुपातिक सूचीमा परेका छन् । भट्टचन प्रभु ग्रुप र प्रभु बैंकका अध्यक्ष हुन् ।