रामेछापेलीबीच महराले भने : कांग्रेस-माओवादी गठबन्धनलाई २० वर्ष कायम राख्नुपर्छ (भिडिओ)

काठमाडौं । नेकपा माओवादी केन्द्रका उपाध्यक्ष तथा पूर्व सभामुख कृष्णबहादुर महराले अहिलेको गठबन्धनलाई २० वर्षसम्म सँगै लैजाने बताएका छन् ।

रामेछापका गठबन्धन उम्मेदवारहरुसँग काठमाडौंको अनुपम फुडल्याण्डमा आयोजित अन्तरक्रिया कार्यक्रममा उपाध्यक्ष महराले देशको समृद्धि अभियान सफल बनाउँन यो गठबन्धन निरन्तर हुनुपर्ने बताए ।

महराले भने– यहाँ कांग्रेसका मित्रले गठबन्धनलाई अझै २० वर्षसम्म लैजानुपर्छ भन्नुभयो । वास्तवमा हाम्रो स्पिरिट त्यही हो । प्रतिगमनलाई परास्त गर्न बनेको यो गठबन्धनलाई २० वर्ष लैजानुपर्छ र देशलाई विकास गर्नुपर्छ । कांग्रेस र माओवादी मिलेरै देश बनाउने हो ।

महराले केपी ओलीको नेतृत्वको सरकारले गरेका गलत कामका कारण देश आर्थिक रुपमा संकटमा परेको र अहिलेको सरकारले त्यसलाई सम्हाल्न नसकिरहेको दावी गरे । महराले कांग्रेस माओवादी नमिल्ने हो भने केपी ओलीले फेरि प्रगितमन गर्ने खतरा रहेको समेत बताए ।

रामेछापमा नेकपा एस भने गठबन्धनबाहिर रहेकाले कार्यक्रममा कांग्रेस र माओवादी कार्यकर्ताकोमात्र सहभागिता थियो । गठबन्धनमा प्रतिनिधिसभामा कांगे्रेसका पुर्णवहादुर तामाङ र प्रदेशमा माओवादीका तारानारायण श्रेष्ठ र युवराज चौलागाई उम्मेदवार छन् ।

एमालेबाट प्रतिनिधि सभामा कैलाश ढुंगेल र प्रदेशमा शान्ति पौडेल तथा मिलन घिसिङ उम्मेदवार छन् ।