लजको कोठाभित्र गोप्यरुपमा भिडियो बनाउने म्यानेजर भन्छन्- मेरो यो ‘प्यासन’ हो, मज्जा आउँछ

काठमाडौं । लजको कोठामा बस्न आएका पाहुनाको गोप्यरुपमा भिडियो रेकर्ड गर्ने गरेको आरोपमा पक्राउ परेका व्यक्तिले ‘प्यासन’का कारण त्यसो गर्ने गरेको बताएका छन् ।

महानगरीय प्रहरी वृत्त महाराजगन्ज स्रोतका अनुसार प्रारम्भिक सोधपुछका क्रममा उनले भनेका छन्– मेरो यो प्यासन हो। यसो गर्दा मज्जा लाग्छ ।

प्रहरीले काठमाडौंको बाँसबारीस्थित बाँसवारी रेष्ट्रो क्याफे एन्ड लजका म्यानेजर मुकेश मालीलाई पक्राउ गरेको हो । उनी त्यस लजका म्यानेजर हुन् । ज्वाईको लजमा म्यानेजर रहेका उनी विवाहित हुन् ।

प्रहरीका अनुसार केही दिनअघि उक्त लजको कोठामा परिवारसहित बस्न आएकी एक महिलाले ढोकाको दुलोबाट क्यामेराले खिचेको जस्तो लागेको भन्दै प्रहरीकहाँ उजुरी गरेपछि अनुसन्धान अगाडि बढाइएको थियो ।

त्यसपछि प्रहरीले लजका सबै स्टाफको मोबाइलमा खानतलासी गरेको थियो । त्यहिक्रममा मालीको मोबाइलमा ६÷७ वटा भिडियो भेटिएको एक अनुसन्धान अधिकृतले बताए ।

‘विभिन्न समयमा उक्त लजमा बस्न आएका पाहुना कोठाभित्र रहेका बेला बाहिरबाट गोप्यरुपमा भिडियो रेकर्ड गरेको देखिन्छ’, ती अधिकृतले भने । प्रहरीलाई उजुरी गर्ने महिलासँग सम्बन्धित भिडियो भने भेटिएको छैन ।

‘प्रहरी पुगेपछि मोबाइलमा रहेका भिडियोहरु धमाधम मेटेको देखिन्छ । त्यसैले मोबाइललाई डिजिटल फरेन्सिक ल्याब पठाइएको छ’, ती अनुसन्धान अधिकृतले भने ।